Anda di sini

APMM Sarawak mujur nangkap kapal berikan ngundan 11,000 liter diesel

Advertisement

KUCHING: Ejensi Peneritadat Maritim Malaysia tauka APMM (Kandang tasik Sarawak) mujur mutarka kes keterubah taun tu, ulah enchuri diesel enggau nadai pemendar.

Direktor Operasyen APMM Pelilih Menua Kuching Shahref Steve Mac Queen Abdullah madah, raban maritim mujur ngetan sereta nangkap sebuah kapal berikan menua tu ke dijangka mai kargo minyak diesel ke enda dikemendar.

Shahref madah kapal nya ke endang bisi lisin bejalaika pengawa berikan ditangkap bot maritim maya raban nya bejalaika pengawa sida di tasik kena lemai 4 September tu tadi, urung 11 Batu Nautika ari Tanjung Po.

Maya diperesa, kapal nya itemu mai urung 11,000 liter minyak diesel ke dipelaba mangai RM13,200 ti dilalai dalam peti ikan ke udah diubah enda nitihka pemendar.

“Kapal nya tau tinggang ukum ketegal penyalah nya nengah Genteran Tusun Ukum ‘Akta Perikanan’ 1985, iya nya mai kargo minyak ke enda dikemendarka,” ku Shahref madah ba aum media di jeti APMM ditu, kemari.

Kapal nya diatu ditan ba Jeti Maritim Kompleks Tun Abang Salahuddin (KOMTAS) laban deka ditasat, nyengkaum orang ke ngereja penyalah nya, rayat Indonesia ke benung ditasat.

Iya madah kes tu ila, nyangka deka diserah ngagai Opis Menteri Dagang Dalam Menua, Koperasi enggau Pekara Bebeli Barang (KPDNKK) laban nya bisi kaul enggau barang ke dibai pansut tauka tama ke enda dikemendar.

Iya nandu, APMM Pelilih Menua Kuching  seruran bejalai meresa tasik menua tu, ngaga operasyen begulai enggau sekeda opis sereta ejensi perintah bukai, ngemunaska pengawa mai barang tama tauka pansut belalai ari menua tu tauka nebang kayu ke enda dikemendar sereta sekeda kes bukai.

Kapal berikan nya dirijista di Kuching ari baruh bot berikan.

Advertisement