AMBIKA PENGINGAT: Dusit (ba baris belakang, tujuh ari kanan) begambar engagu bala nembiak disempulang apai indai enggau raban pengatur licha pelajar nya.
Pengeliat enggau pengeran ati deka nyulut dalam pelajar nyadika kunchi pemujur dalam pengidup
KUCHING: Pengeliat ati ngetanka tikas peninggi disiplin sereta pengeran deka nyulut, dua bengkah pekara ti ulih nyaup bala nembiak mujur dalam pengidup.
Presiden Gerempung Graduet Dayak Sarawak (SDGA) Dr Dusit Jaul lebuh ke meri licha pelajar ngagai 200 iku nembiak ari SMK Sibu Jaya, Sibu enggau bala nembiak sekula Primari ke besemak enggau dia kena ujung minggu nyin tadi madah, pengeliat ati ngetanka peninggi tikas disiplin ulih mantu nembiak ngemeratka batang juluk ati sida ngambika mujur dalam pelajar.
Ngembuan penegap juluk ati deka nyulut nyadika peransang ngagai sida ngambika teulihka pemujur, pia ku iya baru.
Ku iya, pengeliat ati nya beguna amat ngambika bala nembiak ulih ngetanka tikas disiplin ti tinggi belama, ke lebih agi ngagai bala nembiak ke besekula pulai hari ti betapi enggau mayuh macham pekara ninting hari, ke tau ngeruga pelajar sida.
“Pengeliat ati ngetan tikas disiplin ke tinggi nya deka nyadika terabai ngagai sida nyeliahka diri ari penusah rama. Ngambika ulih mujur, bala nembiak enda tau enda ngembuan pengeran ati ngambika teulihka pemujur, keterubah lebuh ke agi belajar lalu nangkanka nya pengudah bulih pengawa.
“Sida enda tau enda tedani meda pengamat pekara ke nyadi laban ba pekara ekonomi, sida mega sebagi ari nya diatu, laban sesiku ke ngembuan pelajar, penemu enggau pengelandik deka bisi pengelebih. Sesapa ke nadai ngembuan pengelebih nya, sida semina deka pepeli leka mata meda peluang ke mansa sida ,” pia ku Dusit lebuh ke bejaku ba mua nembiak enggau apai indai ke bisi ngulu licha nya.
Ku Dusit enti sema pekara tu nyadi, ukai semina nembiak nya aja berasai asa endar ati, tang mega menua Malaysia ti udah chakah nempa mudal mensia ari nembiak rebak baru, pia ku iya madah ngagai The Borneo Post kemari.
Apai indai mega dilalau chakah nyengulaka anak sida sereta anang semina ngelempaika tanggungpengawa nya ba sekula aja. Dusit mega meransang apai indai ngedutka kaul enggau raban sekula nyengkaum regas agi bejalaika tanggungpengawa sida lebuh ke nyadi kaban Serakup Apai Indai enggau Pengajar (PIBG).
“Pemujur ba pelajar begunaka gempung sereta tanggungpengawa ari semua baka raban sekula, apai indai enggau nembiak nya empu.
“Aku pechaya enti kitai nerenak pekara nya dalam runding, chakah sereta bisi ati ba pekara nya, bala nembiak ulih mujur dalam peresa. Nya ukai semina begunaka pengeliat ati ari semua orang ke bekaul, tang ke lebih agi apai indai enggau nembiak nya empu,” pia ku iya.
Bala nembiak ke datai ngulu program ti dipejalaika Dusit iya nya bala nembiak ke deka ngambi peresa enda lama agi. Program nya diatur SDGA begempung enggau Kelab Dayak PILA Sibu.