KUCHING: Kimpin ngulihka sain dikena nujukka sukung ngemaduka ‘Akta Hasutan’ 1948 ke diketuai Luyar Muda Kebangsaan ari Komiti Gerempung Luyar enggau sukung Nembiak Muda Keadilan (AMK) Parti Keadilan Rakyat (PKR) Sarawak, udah bisi nerima lebih 100 iti sain.
Ketuai program nya Simon Siah Sy Jen madah, tajapan baru sehari kimpin nya dipejalai, tang sida udah nerima 100 iti sain ari mensia ke bisi datai ngagai Palan Bedagang Satok enggau Kubah Ria.
“Kitai baru bejalaika kimpin ngemaduka ‘Akta Hasutan’, tang nya hari keterubah kimpin ke diatur ba Palan Bedagang Satok enggau Kubah Ria ke bisi nerima sukung ari bala mensia ke bisi datai ngagai endur tu,” ku iya.
Simon madah, sain ke bisi digumpul nya deka diberi ngagai perintah kelebih agi ngagai Menteri Besai Datuk Seri Najib Tun Razak.
Iya mega madah, Kuching nyadi seiti palan endur kimpin nya dipejalaika sebedau dibai ngagai palan bukai ke bisi di nengeri tu.
“Kimpin tu diatur dikena meri penemu ngagai rayat menua tu bekaul enggau akta nya enda manah diguna di menua tu tang patut diketu enggau lengkas.
“Enggau chara ngumpul sain, tu seiti chara ke patut dikena nunjukka sukung ke chukup tegap sereta peminta rayat empu di menua tu,” ku Ketuai PKR Pampang Bandar Kuching nya.