Dikarang Jacqueline R. David
KUCHING: Timpuh muka palan pemerindang tauka kelab malam meseti ditetapka enda ngelui ari jam ke patut, ku Sapit Menteri Dalam Menua Datuk Wan Junaidi Tuanku Jaafar (gambar).
Iya madah, Opis Kandang Menua meseti beratika sebarang penyalah ke bisi nyadi di palan pemerindang lalu enti palan nya ngereja pengawa salah, lisin sida iya patut dikinsil lalu sereta polis patut ngemataka semua palan pemerindang di nengeri tu.
Ku Wan Junaidi, jam ungkup semua palan pemerindang dibuka patut bisi timpuh ke sebaka.
“Enti di menua England, sida nadai atur nyekat ngirup arak, manggai jam 11 malam, bar sida iya nadai agi nyual tauka nyadung arak. Nama kebuah kitai enda ulih ngaga bansa nya? Di United Kingdom, bejuta iku temuai ari menua luar ke raun ngagai menua nya, ukai orang ke deka ngirup. Nya mandangka sida ke bisi palan pemerindang di UK ngemeratka lisin diri empu.
“Palan pemerindang patut badu agi nyadung arak maya udah manggai pukul 11 malam. Nyema orang bisi minta pan kitai badu agi nyual. Jam palan pemerindang ditutup meseti bisi ditetap. Menua maju udah mayuh meri kitai peneleba ba sukut pekara tu,” ku Wan Junaidi.
Iya madah munyi nya ba aum media pengudah ngabas ruang bilik orang ke dituntung penusah angus rumah di Kpg Senari ditu, kemari.
Ku iya, nyema Opis Kandang Menua (PBT) bisi tetemuka palan pemerindang ngereja penyalah, PBT patut narit baru lisin nya.
“Enti sema taukey palan pemerindang nya muka palan pemerindang bukai ngena nama orang bukai, tauka kunsi, PBT patut nemu pekara tu, anang semina nyalahka orang bukai aja,” ku iya.
Kelimpah ari nya, iya madah, Kepala Polis Menua Sarawak udah dipadah ngasuh polis nyaga tauka meresa semua endur ke engkeman alai ngemataka palan pemerindang kelebih agi maya udah jauh malam.
“Enti ulih, peresa semua kerita ke agi bejalai dini hari, peresa enggau silik, giga perengka ke nyelai ke bisi dilalai dalam kerita. Enti bisi temu, bai sida tu ngagai palan polis, lalu di balai polis baru sida iya madah kebuah mai barang ke nyelai tauka senjata.
“Aku deka baum enggau PBT, enggau sida ke bisi ngempu palan pemerindang enda lama agi. Kitai patut nyaga Sarawak, nyaga menua kitai empu.
“Enti penusah bansa tu nyadi, tanya diri empu. Sida ke gawa ba PBT patut nemu naka ni palan pemerindang, rumah urut, karaoke tu ulih dibuka. Pekara tu meseti diperunding nyema bisi sekeda ke minta dibuka nyentuk ngagai dini hari. Undang-undang tetap undang-undang,” ku iya.
Iya nandu baru, enti nunda, semua renggat umur peranak menua tu patut bisi tanggungjawap, ukai semina polis, PBT tang mega komuniti.
“Enti diperatika, berapa buah kedai di menua kitai tu, enti nembiak sekula meli arak, bisi ke enda sida ke bempu kedai terit nitihka undang-undang, tanya tingki nembiak nya. Rayat menua kitai sigi enda ngemeratka undang-undang.
“Sida ke bedagang meseti bekerejasama nitihka undang-undang ke udah ditetap. Menua kitai tu tusah endar deka nitih undang-undang, semua ka ngaga undang-undang kediri empu,” ku iya lalu nambah, enti nitih, gaya pengelikun di Sarawak tu agi ulih dijaga.
Iya madah, penusah ke nyadi di Jalai Abell bedau lama tu tadi, alai dua iku nembiak universiti ari United Kingdom parai kena bunuh seraban nembiak ke mabuk sereta udah makai dadah, pekara ke enda dijangka.
“Penusah nya nyadi ari entara bala nembiak nya empu endang nadai disadang, tang kes nya ulih dikumbai kes ke enda patut nyadi.
“Taja pan dua iku nembiak ari UK nya semina deka merindang diri empu tang chara sida iya enda sebaka enggau chara kitai ditu merindang diri, tambah mega maya nya nyau dini hari kira pukul 4 pagi agi ngirup. Enti di UK, pulai mabuk pan nadai penanggi, tang ditu, dua iku nembiak nya betemu enggau nembiak kampung ke udah mabuk sereta gian dadah.
“Dadah ke dipakai nembiak nya (Syabu) tau ngasuh sida iya nyadi mangah. Pengawa belaya di nengeri tu sigi suah didinga kitai sereta ngena senjata. Enti amat deka belaya, bebukut ngena jari, nama kebuah sampai mai senjata lalu munuh orang?
“Chara kitai bejalaika pengawa dagang tauka ngaduka pendiau diri, dalam ati kitai empu patut udah bisi ngembuan ulah ke mereti. Pedagang ke bempu palan pemerindang, enda tau ngelakar undang-undang, pebasaka undang-undang, anang semina nganti polis, PBT tauka orang bukai…Kitai bisi undang-undang, nya meh patut dibasa kitai,” ku Wan Junaidi.