SIBU: Kaban Kunsil Nengeri (ADUN) Dudong Yap Hoi Liong (gambar) ngelalau rayat di menua tu ngambika terus bebasaka pengawa megai jalai pengarap ke nadai besekat.
Iya madah, tu endang batang pekara ke ngujungka rayat lantang sereta likun diau di menua tu.
“Malaysia benasip amat laban ngembuan prinsip megai jalai pengawa nadai besekat laly rayat patut bebasaka prinsip nya ngambika kitai terus diau lantang sereta likun,” ku iya.
Yap madah munyi nya rambau aum pengarang berita ditu kemari.
Nangkan ke nya, Yap madah penyarut pasal jalai pengarap entara rayat tau ngenataika mayuh penanggul lalu pengujungka iya ila tau ngasuh menua pambar.
Yap madah, perintah Malaysia mega patut nentuka nadai rayat besangkut paut enggau ulah ti kelalu ekterim ba jalai pengarap.
Iya madah, perintah Malaysia patut nyidi sebarang aktiviti kasar ba menua luar engagu nangkap sida ke besangkut paut nyema pulai ngagai menua tu.
“Pekara ke bansa tu endang pekara berat lalu kitai enda tau ngelakka aja laban nenama aja utai ke besangkut paut enggau ulah ti kelalu eksterim enggau ngemeratka bansa diri,” ku iya.
Iya madah, menua Malaysia nadai begunaka rayat ti chakah enggau orang ngereja ulah ti ekterim endur nyapai pengingin ati sida.
Tambah mega, ulah ke bansa nya patut ditagang ngambika kaul enggau penyerakup rayat ba menua tu kenyau ari suba terus beretan lama.