KUCHING: Ketuai dalam Parti Se’ati Rayat Sarawak (SUPP) diansak bebaik enggau United People Party (UPP) ungkup pemaik raban bansa China di nengeri tu.
Ngenetap jaku nya, Kepala Menteri Tan Sri Datuk Amar Adenan Satem nambah kededua parti ti tebal agi ngarika bansa China nya patut ngadu sempekat ngambika sida mengkang bisi pengari dalam perintah Barisan Nasional (BN).
“Aku ngansak SUPP enggau UPP berengkah bejaku enggau pangan diri. Tu meh maya kededua parti tu bejaku lalu ngiga sempekat ungkup pemaik raban bansa China.
“Aku pechaya kita dalam SUPP enggau UPP ngelala sapa munsuh ke endar. Kitai enda ulih ngerampas penuduk ke udah diempu penyakal enti laya tu dipajak.
“Bepelasarka sukung bansa China ba pemutus pengawa bepilih nengeri di Balingian sereta sekeda sitak di Semenanjung Malaysia bedau lama tu tadi, aku pechaya kita ulih ngerampas Batu Kawa, Dudong, Meradong enggau sekeda penuduk bukai.
“Tang enti kita majak belaya sama diri, peluang ngerampas penuduk nya pulai mit lalu ketegal nya aku minta SUPP enggau UPP ngepunka jaku tauka randau enggau pangan diri,”ku iya.
Adenan mansutka jaku tu maya bejadi pengerami ngintu 55 taun penumbuh SUPP ke bela digulu presiden parti ari mayuh parti dalam serakup BN di sebuah hotel ditu, malam ensanus.
Pechaya penumbuh UPP bepun ari penyarut ke nuntung SUPP, Adenan ngasaika nadai seiku raban bansa China lantang meda laya ke nyadi entara raban ketuai dalam parti nya.
Ku iya, ajih ke pemadu deka dipeda bansa China iya nya meda sida beserakup nengah seiti parti baka ke diasai bansa Melayu enggau Melanau ke beserakup nengah Parti Pesaka Bersatu (PBB).
Adenan sekali agi enggau nyemetak madah enti laya nya tau ngelemika pengering BN, iya ke nyadi Chairman BN Nengeri deka masuk champur.
“Aku enda ulih ngaga diri enda nemu tauka enda ibuhka pekara ke nyadi ketegal laya nya tau ngelemi pengering BN.
“Bejaku enggau pangan diri, pekara tu udah kala dikereja menya lalu ulih dikereja diatu.
“Aku deka ngenataika jaku ansak ke sama ngagai Dato Sri Wong Soon Koh sereta ketuai bukai ti nitihka iya,” ku iya.
Kekadang kitai ngungkup kelalu mayuh awak belaya enggau pangan diri ti ngujungka kitai enda ngelala sapa bagi munsuh ke endar, tandu iya.
Bela datai bini Adenan, Puan Sri Datu Jamilah Anu, Presiden SUPP Tan Sri Peter Chin, Presiden Parti Rakyat Sarawak Tan Sri James Masing, Pemangku Presiden SPDP Datuk Seri Tiong Khing Sing, Presiden GERAKAn Dato Sri Ma Siew Khiong, Presiden MCA Dato Sri Liow Tiong Lai, Presiden UPKO Datuk Madius Tanggau enggau ketuai bukai.