Anda di sini

Sim: Anjung riput pampang enggau naka pengelengkas

Advertisement

KUCHING: Semua pampang Parti Sa’ati Rakyat Sarawak (SUPP) ke bedau nganjung riput dipinta nganjung nya enggau naka pengelengkas ngagai Indu Opis.

Nitihku Sekretari Besai parti Senator Datuk Professor Dr. Sim Kui Hian, semua pampang udah dipinta ngatur aum pemadu laun kena 3 Ogos tu tadi lalu riput patut udah bisi.

Kelimpah ari pampang di Belaga ke diinsur timpuh baum laban bisi penanggul, ku iya.

“Sekeda pampang ke tumu ngatur aum besai tiga taun sekali (TGM) bisi udah nganjung riput tang ngagai sida ke baru tembu baum Hari Minggu tu tadi mega patut nganjung.

“Malam tu (malam ensanus) kami bisi pengerami makai malam (nyerumba Genap Ke-55 taun SUPP udah ditumbuhka), lalu sekeda sida ke datai ari luar mengeri tu enggau ke bisi ditu dipelaba nganjung riput nyerumba pengerami nya,” ku iya.

Dr. Sim mansutka pekara tu dalam aum enggau pengarang berita pengudah tembu baum Central Working Committee (CWC) ke diatur ba Indu Opis SUPP ditu, lemai kemari.

Aum nya kemari bechairmanka Presiden parti Tan Sri Peter Chin Fah Kui.

Nandu baru Dr. sim madahka pampang ke bedau ngajung riput dipinta ngajung enggau naka pengelengkas, ngambika ulih diperesa sebedau dianjung ngagai Opis Pengerejister Gerempung (ROS).

Kelimpah ari nya, kebuah minta riput dianjung lengkas ngambika sekretariat  bisi awak meda enggau ngadu sebedau parti ngatur Aum Pengari Tiga Taun (TDC) enda lama agi.

“Ngarapka riput nya ulih dianjung dalam timpuh beberapa hari tu.

“TDC deka diatur kena 23 Ogos tu nya kebuah kami minta semua pampang nganjung riput, kelimpah ari pampang Sibu ti udah digantung.

“Tu ulih nulung kami napi sebarang penanggul pasal pengawa bepilih pampang tauka enti bisi pekara bukai,” ku iya.

Nambahka nya lebuh ditanya sekalika Menteri Besai Datuk seri Najib Tun Razak deka bejadika TDC, Dr Sim madahka sida bedau nerima sebarang pemutus ari opis Menteri Besai.

“Kitai semua nemu Menteri Besai kitai agi bejalai ke menua tasik lalu kitai bedau ulih berandau enggau iya diatu tang pengudah iya pulai ila kitai deka berandau enggau iya,” ku iya.

Nambahka nya iya madahka entara pekara ke dikerandau maya baum ensanus nyengkaum pasal pengerami makai malam Genap Ke-55 SUPP udah ditumbuhka sereta berandauka atur TDC.

Advertisement