KUCHING: Gerempung Dayak Sarawak (SDNU) ke udah mantu Suruhanjaya Perkhidmatan Awam (SPA) ba pengawa ngerijister raban graduet bansa Dayak sereta nembiak ke udah nembuka SPM/STPM ngagai ‘SPA online database’, ngarap orang ke dikangau interviu nyikap diri napi tanggung pengawa perintah jemah.
“Kami enda lantang ati pengudah sekeda orang nyengkaum bansa Dayak ke dikangauka interviu enda mujur nempuh penguji nya laban sida enda nyikap diri,” ku Mandal Presiden SDNU Anthony Banyan.
Anthony madah iya sinu ngenang bansa Dayak ke enda mujur ba pengawa interviu lalu ngarap pekara nya enda ngelemi semengat orang (Dayak) bukai ngerijister diri ba ‘SPA online database’.
Ketegal nya, SDNU deka ngatur inisiatif nyendiaka licha senentang chara napi interviu di Rumah Dayak Saratok kena 16 Ogos tu, ke alai penyereta mega diberi awak ngerijister diri dalam sistem ‘online’ SPA.
Anthony madah, pengawa di Saratok nya ti berengkah pukul 8 pagi nyentuk ke pukul 4 lemai deka dipenyadika presiden SDNU Tan Sri William Mawan Ikom.
Iya nambah, sekeda palan pematih peribit deka mantu ngemujurka licha nya lalu arap semua raban graduet bansa Dayak sereta nembiak ke udah nembu SPM/STPM datai.
Sida dipinta mai MyKad, setipikit akademik, pemutus peresa enggau bup endur ngerikut sekeda penerang ke diguna.
Ngenang kaul bukai, Anthony nesau orang ke udah meli tikit (mija) ungkup pengawa makai lemai ngelalu penemuai raban Dayak ari Kalimantan Barat kena 10 Ogos tu naruh dulu tikit sida laban pengawa nya udah dilanjar ngagai maya bukai ti bedau ditetapka.
Iya madah raban Dayak ari kalimantan Barat nya disadang datai dalam bulan September.