Anda di sini

PGA nadai dipinta mantu matau kandang ESSCom

Advertisement

KUCHING: Komander PGA Briged Sarawak Datuk Isa Munir madah penyampau tubuh raban polis ba Kandang Endur Pengelikun Pantai Timur Sabah (ESSCom) naka ke diatu chukup.

Berindik enggau nya, iya netapka bedau bisi dipinta dikenatai ngagai Pasukan Gerakan Am (PGA) Briged Sarawak ke minta bantu matau kandang endur nya.

Taja pia, iya ngelempai ngagai Ketuai Besai polis di Bukit Aman ngeletak sebarang pemutus sekalika beguna tulung ari Sarawak.

“Pengawa ngintu pengelikun majak dipejalai. Kitai bisi mayuh batalion di serata menua, engka atur ngintu pengelikun deka ditusun begintir ngambika raban polis ari Sarawak ulih pulai kelimpah ti ngulu sekeda latih ke bisi diatur,” ku iya.

Iya mansutka jaku nya ngagai pemberita ba pengerami Hari Raya PGA Briged Sarawak di Jalai Batu Kawa, ditu kemari.

Isa nambah semua 400 raban PGA Sarawak di Sabah diarika dua kompeni iya nya  Batalion 10 enggau 12 ke alai sida disadang pulai dalam timpuh sebulan agi.

Raban PGA Sarawak berengkah dianjung ngintu pengelikun di Sabah kenyau ari pun taun ke dulu suba.

Ngenang pengerami Hari raya ke diatur kemari, Isa madah pengawa ke sama deka diatur di Sibu enggau Bintulu ngambika tau ngedut kaul entara polis enggau mensia mayuh ke diau besemak.

Iya pechaya, pengawa nya tau nerenak pemereti mensia mayuh kelimpah ti tau ngurangka penyampau kes pengawa jai.

Pengawa diatur berengkah pukul 10 pagi nyentukke pukul 2 lemai sereta digulu urung 1,200 iku pengabang.

“Kami pechaya nengah kaul ti rat entara mensia mayuh enggau polis, kitai ulih begempung ngemunas pengawa jai,” ku iya.

Advertisement