Rayat menua tu ringat laban udah kelalu lama suntuk belanja
KUCHING: Peminta ditikika 20 peratus royalti minyak enggau gis ungkup menua nya mandangka pengeringat ati rayat menua Sarawak.
Nya mega mai reti nengah peminta nya deka nelengaka pintu ngagai semua pekara nyengkaum runding ngagai kededua piak ari perintah enggau peribit ngambi beratika pekara nya enggau silik.
“Peminta nya mandangka pengeringat ati rayat Sarawak ke udah suntuk belanja ngelama tu. Nya mega mai reti nelengaka pintu endur ngatur randau.
“Engka ukai 20 peratus dalam mata duit dibayar ngagai Sarawak tang pengawa nikika penyampau nya tau diperatika ari mayuh chara baka kontrak ngagai kompeni peranak menua tu, pengawa puang, pengereja pengawa enggau sekeda pekara bukai.
“Dikena nyilih semua nya, bayar royalti minyak enggau gis tau ditikika ngagai 15 peratus,” pia ku Menteri Pemansang Tanah Tan Sri Dr James Masing madah ngagai The Borneo Post empai lama ke udah.
Iya mansut penemu munyi tu nimbal penerang ti dipansutka mandal presiden Malaysia Petroleum Management Adil Zulkifli, ke meri penerang ngagai media di Sabah sentang penguntung ari penyampau royalti minyak enggau gis ti ditiki berengkah ari 5 nyentuk ke 20 peratus.
Taja pan peminta nya digaga perintah Sarawak pengudah resolusyen dianjung maya Aum Kunsil Nengeri ke diatur kena bulan Mei tu tadi, ke minta penyampau royalti ditiki belabuh ari 5 nyentuk ke 20 peratus, tang media di Sarawak nadai kala diberi penerang pasal pekara nya.
Taja pan aum tetutup bisi diatur entara Petronas enggau perintah menua kena 30 Jun, tang pemutus ari aum nya nadai kala dibantaika.
Rayat menua Sarawak deka nemu pemutus, nya alai Adil ke disadang deka datai ke Sarawak meri penerang ke sebaka, udah nginsil pejalai iya kitu.
Lebuh ke meri penerang di Sabah, Adil madahka bayar mata duit di Sabah deka ditiki manggai ba 20 peratus, tang sekeda projek ti dipejalaika Petronas dipelaba deka betapi enggau penanggul laban orang ti beranakka puku ari menua luar kurang pengarap ati ketegal pengelikun di menua tu majak kusut.
Ku iya, ketegal nya mega dipelaba sukung ba kontrak enggau peluang dalam industri nya majak kurang ti ngujungka pengawa ngiga palan minyak diketu enggau bebuaika pengereja pengawa deka nyadi.
“Dalam timpuh ke panjai, kitai deka ngasaika pengusut ba industri minyak enggau gis di Malaysia, ti deka ngusangka asil dalam GDP enggau GNI,” pia ku iya.
Kena nimbal penerang Adil nya, Kaban Kunsil Nengeri sitak Balleh nya madahka menua tu minta royalti minyak enggau gis ditiki nyentuk ke 20 peratus, tang ukai reti enda tau enda dibayar enggau mata duit 20 peratus.
“Aku nemu enti semua penyampau ke ditikika nya dibayar ngena mata duit, nya deka ngenataika penusah ngagai kontrak tauka sempekat ke udah disain enggau orang ti beranakka puku ari menua luar. Taja pan kami nemu tang Petronas mega patut meretika pengeringat ati kami.
“Kami minta bayar nengah mayuh macham chara, ambika chunto baka meri kami jalai alun. Peda meh gaya Pan-Borneo Highway kami. Jalai nya jai agi ari jalai tama nuju genturung pendiau di Semenanjung Malaysia.
“Sida patut nemu asai ati rayat menua Sarawak, baka reti chapi ke udah gemu makai rumput di Sarawak tang tusu iya diambi endur bukai. Rayat Sarawak suntuk belanja. Tu meh utai ti deka dipadahka kami,” pia ku Masing.