Dikarang Rengenyan Labang
KUCHING: Opis Menteri Kunsil Kandang Menua enggau Pemansang Raban Bansa begunaka saup tauka kerejasama ari ejensi ti bekaul bejalaika pengawa nentuka semua palan pemerindang nitihka atur ti udah ditetapka.
Menteri opis nya, Dato Sri Wong Soon Koh madahka, opis menteri iya nengah opis kunsil baka Majlis Bandaraya Kuching Selatan (MBKS) semina bejalaika pengawa meresa gaya premis, pemeresi enggau timpuh bejalaika dagang.
Ku iya saup ari ejensi nya beguna dikena nyeliahka ari sebarang penanggul baka insiden dua iku peranak menua Britain ti kena bunuh.
“Raban penerit adat semina bisi tanggungpengawa ngagai premis, ambika banding dini endur pub nya patut ditumbuh, kami beratka pekara bekaul enggau pemeresi sereta nentuka sida operator bejalaika dagang nitihka atur tauka jam ti udah ditetapka.
“Nya alai kami begunaka saup tauka kerejasama ari polis, opis Imigresen enggau Opis Pengereja Pengawa (Labour Office). Lebih agi kami begunaka saup Imigresen enggau Opis Pengereja Pengawa laban sida ti bejalaika tanggungpengawa, kelebih agi bekaul enggau orang ari menua luar. Ejensi tu ngemeratka agi pekara ti bekaul enggau pengelikun,” ku iya.
Wong mansutka pekara nya dalam aum enggau pengarang berita ke diatur ba Bilik Kaunsil, bekaul enggau dua iku peranak menua Britain ti dibunuh ditu apin lama.
Bejaku baru iya madah, di mengeri Kuching ke ari baruh kuasa MBKS semua Pub, Karaoke, palan urut, kedai makai enggau ngirup, bistro sereta kedai kopi endang bisi jam bejalaika dagang ti udah ditetapka.
Nandu baru Wong madahka operator tauka pengempu palan nya patut nitihka atur ke udah ditetapka opis kunsil.
“Pub enggau Karaoke dikemendarka dibuka naka pukul 2.30 dinihari, lalu palan urut semina naka pukul 12.30 dinihari. Baka kedai makai, kedai kopi, bistro sida dikemendarka bedagang 24 jam enti sida deka. Raban operator enda tau enda nitihka atur tu.
“Enti nyema operator bejalaika dagang sida ngelui ari timpuh ke udah ditetapka, raban penerit adat ti bejalaika pengawa nya deka ngeluarka kompaun RM500 nyentuk ke RM1,000, pia mega palan urut,” ku iya ti minta mensia mayuh ngeriput ngagai polis nyema bisi meda pekara ti enda manah nyadi.
Kelimpah ari nya, lebuh ti ngenang dua iku peranak Britain ke dibunuh, iya nyakal sekeda penemu orang ti madahka ketegal insiden nya ngujungka mengeri Kuching enda likun endur nemuai.
“Sida patut meri langgur runding enggau chara mutarka penanggul tu, sida patut betemu enggau raban bansa lalu betanyaka penemu bakani jalai deka ngelikun mengeri Kuching ngambika manah agi.
“Ukai ngemansutka penerang ti enda manah baka madahka mengeri Kuching tu enda likun. Insiden bunuh ke nyadi tu ukai semina nyadi di mengeri tu aja tang mega nyadi di serata dunya,” ku iya ti seraya madahka Kaban Parlimen enggau Kaban Kunsil Nengeri ari penyakal enda patut mansutka penerang ti madahka mengeri Kuching udah enda likun.
Sama bisi dalam aum enggau pengarang berita nya kemari, Datuk Bandar Majlis Bandaraya Kuching Selatan, Datuk James Chan.