MARUDI: Mensia mayuh ke nguan menua Long Banga di Ulu Baram diatu udah ngasaika perengka guna bekal elektrik 24 jam asil ari program pemansang perintah di menua pesisir.
Penyamai asil ari pemisi bekal kuasa karan nya diatu diasaika raban bansa Kenyah enggau Saban pengudah projek hidro numbas pemesai nya tembu kena bulan Disember taun seiti nyin kemari.
Projek nya digaga pengudah bulih pemendar ari Menteri Besai Datuk Seri Najib Tun Razak, maya iya datai nemuai ngagai Long Banga kena bulan Julai 2010.
“Berindik ari nya, kami chukup meri besai terima kasih ngagai Menteri Besai enggau perintah Barisan Nasional (BN) ke udah ngemujurka projek hodro numbas pemesai nya ke ngujungka pemansang sereta mai ubah ngagai pengidup kami ditu,”ku pengari peranak Long Banga Charlie Tai Udau, maya dirandau Utusan Borneo ditu ensana.
Iya madah nengah program transformasyen nya, ukai semina kuasa karan udah diasaika sida tang mega perintah bisi udah ngemanahka jalai bepun ari Miri nuju ngagai Long Banga balat ngemuntangka pejalai.
Enti suba sebedau digaga manah, pejalai ngagai Long Banga ke bepalan ba entigis ulu sungai di Baram, beguna awak 8 ngagai 10 jam pejalai nengah jalai batang, tang diatu semina setengan ari jam pejalai enti ngena kerita pikap kelimpah ngena kereban pengangkut bukai.
Laban palan tu chukup jauh ba menua ulu, nyadi perintah udah ngaga seti padang bilun mit dikena ngemuntangka bilun engkabang terengkah lalu bilun MAS bisi datai dya kali seminggu (Hari Dua enggau Hari Enam) ari Miri enggau Marudi nuju ngagai Long Banga.
“Jalai raya ke udah digaga manah mega nyau ulih besambung ngagai padang bilun Long Banga sereta ngemuntangka agi pejalai sida ke ngena bilun,” ku iya.
Kelimpah ari nya, ku iya asil pengawa ngaga projek hidro nya, perengka guna bukai bela ulih digaga manah lalu ngarapka pemansang nya tau narit ati bala nembiak ke udah belelang ngagai mengeri besai ulih pulai ngelimpangka diri nyengguk menua.
“Pengawa enggau juluk kami tu chukup setipak enggau utai ke dikingginka kami (bansa Saban) ti suba semina bisi 90 pintu (taun 2010) lalu pengudah projek hidro digaga lalu jalai raya udah digaga manah, diatu rumah panjai kami nyau betambah ngagai 120 pintu.
“Kebuah pia laban nembiak rebak baru ke dulu suba bisi udah ninggalka menua gawa di mengeri besai, diatu nyau mulaika diri ngagai rumah panjai laban ke pinchin gawa perintah lalu bisi sekeda sigi ngemaduka diri. Tu seiti pemansang ke chukup manah ngagai kami,” ku iya.
Pekara ke lebih ngasuh sida berasai tekenyit ku iyam maya program Hari Diri Sebilik ke diatur Komiti Penyerakup Long Banga di Miri empai lama ke udah, bisi 50 iku diri sebilik pulai ke menua bebala mayuh ngena kerita pikap.
Chairman program nya, Solomon Nyian udah ngatur mayuh bengkah aktiviti nyengkaum besenam, pekit nyumai enggau mandangka mayuh macham tanda maya pengerami makai lemai dikena ngerapitka kaul raban bansa Saban di Long Banga sereta enggau bansa bukai.