KUCHING: Parti Keadilan Rakyat (PKR) Sarawak ngemansutka langgur penemu minta perintah nengeri berundingka chara ngiga jalai dikena mutarka penanggul jalai udu sekut ba lampu trafik Kuching Sentral.
Sapit Ketuai Indu PKR Voon Shiak Ni (gambar) madah, jalai bukai ke patut digaga dikena mutarka penanggul sekut tu iya nya belabuh ari simpang lampu trafik Jalai Stutong baru nuju ngagai Jalai Sungai Tapang kira dua kilometer penyauh.
Iya madah, enti jalai nya digaga tentu penyekut ba Kuching sentral ulih diputar.
“Diatu gaya trafik ba kandang Kuching Sentral kelalu deat kelebih agi maya orang bela seretai mulaika diri ngagai rumah nyentukka pengguna jalai raya tepekul lebih 30 minit.
“Penanggul tu ukai maya jam pengerami aja tang nyadi ninting hari laban mensia mayuh bela betengahka jalai nya,” ku iya rambau dirandau pengarang berita ba opis iya ditu kemari.
Nya alai, Voon madah pengawa ngaga jalai tambah dikearapka ulih mutarka penanggul jalai sekit ba kandang Kuching Sentral.
“Kami ngarapka Opis Kereja Raya enggau opis kandang menua setuju enggau langgur penemu ti dibantaika tu,” ku iya.
Berebak enggau nya, Chairman PKR Sarawak Baru Bian nengah penerang surat berita ke dibantaika kemari ngarapka Menteri Besai Selangor enda ngeruga pengawa Pakatan Rakyat ti benung nyikap diri napi pengawa bepilih besai ke deka datai.
“Tu endang udah nyadi utai ke dikearapka semua kaban parti ngambika penanggul tu ulih diputarka sebedau pengawa bepilih besai kelebih agi pengawa kami ti deka nyikap diri napi pengawa bepilih nengeri tu,” ku iya.
Dulu ari nya, Sekretari PKR Stampin Desmond Kho madah, bala sida diatu benung bejalaika kimpin ngerejista pengundi kelebih agi ungkup sida ke nembiak.
“Naka tu, bala kami benung bejalaika kimpim ngerejista pengundi kelebih agi ungkup sida ke nembiak.
“Naka tu, kami udah mujur ngerejista lebih 100 iku pengundi baru ari sida ke nembiak.
“Batang pekara ke dikemerat maya kimpin tu iya nya ngerejista sida ke nembiak laban lebih kurang 65 peratus sida ke nembiak bedau ngerejista diri nyadi pengundi ba nengeri tu,” ku iya.
Iya madah, maya kimpin tu mega mensia mayuh bepeluang bulih baju khas ke bisi dijual.