KUCHING: Perintah Negeri sedia mantu ruang bilik kededua pelajar peranak Britain ke mati dibunuh tumu pagi Hari Tiga tu tadi.
Kesal ngenang penusah ke nyadi nya, Menteri Kanan Tan Sri William Mawan Ikom bela minta ampun ngagai ruang bilik kededua mansa ngarika perintah nengeri.
“Semua rayat Sarawak enggau Malaysia ngutuk ulah saspek ti enda mandangka penyiru, pementas enggau penaluk ngagai pangan diri ti lama udah dikemeran di menua tu.
“Ngarika perintah nengeri aku minta ampun ngagai ruang bilik dua iku pelajar nya.
“Aku pechaya, nenama aja bengkah bantu ke diguna kededua ruang bilik kelebih agi ba atur mai pulai tubuh seduai ke menua asal, perintah nengeri nadai kakang mantu,”ku iya.
Mawan ke mega Menteri Pemansang Rama mansutka jaku nya lebuh dikerandau malam ensanus pengudah ngulu pengawa nungkun dian, meri basa ngagai kededua pelajar peranak Britain nya.
Mawan nambah, seduai enda patut kena bunuh bansa nya lalu iya pechaya orang ke ngereja penyalah nya deka dipechara nitihka ukum ti setipak
“Menua kitai bisi undang-undang ke alai barang sapa ke ditemu salah sigi deka diukum.
“Berindik enggau nya, kitai nyerahka kes tu ngagai polis ngambika tau dipansik enggau silik lalu ngeletak ukum nitihka pematut,”ku iya.
Ba pengawa nya, mensia mayuh ke nedat palan endur penusah nyadi di Jalai Abell bela bisi meri basa ke penudi ngagai kededua pelajar ke udah bebadi nyawa nya.
Pengawa nungkun dian sereta ngengkahka bungai malam ensanus diatur sebengkah gerempung ke ukai dikuasa perintah (NGO), 1BFF.
Dua iku nembiak ti udah kena bunuh tu iya nya Neil Gareth Dalton enggau Aidan Brungar beumur 23 enggau 22 tahun lalu benung nembuka pelajar nyadi lutur ba Sepital Besai Sarawak (SGH) pengelama enam minggu.