MENDINGKA PENERANG: Tengku (tiga kanan) mendingka penerang lebuh bala ketuai raban bansa ari kandang menua Song Ili, Kapit nemuai seraya belajar ngagai SALCRA kandang menua Saratok, Sri Aman enggau Bau/Lundu apin lama ke udah.
BETONG: Perintah meransang rayat di menua pesisir ngemajuka diri sereta anang ngarapka bantu ari orang bukai ngulihka pemujur.
Sekreteri Politik Kepala Menteri Tengku Gruna madah, sida semina anang enda ngambi peluang nengah aset ke dikemisi dikena nyungkak ekonomi diri enggau sida sebilik ngambika setipak enggau pemansang ke diatu.
Ku iya, chara ke pemadu manah iya nya ngulihka penemu nengah peneleba ke dikembuan sebedau tu ngambika setipak enggau raban bansa bukai lalu besaup ngemansangka menua tu.
“Kitai patut beratika tetiap pemujur sereta mansik singkang ke patut dikena nyapai pemujur enggau jalai pengidup ke meruan agi.
Iya bejaku munyi tu lebuh ke dikerandau maya nemuai seraya belajar bala ketuai raban bansa ari Song Ili, Kapit ke SALCRA kandang menua Saratok, Sri Aman enggau Bau/Lundu apin lama ke udah.
Program ke diseretai 30 iku ketuai raban bansa baka Pengulu enggau Tuai Rumah nya diatur kena ngiri penemu ngagai sida ngambika ulih mai ubah dalam bidang betanam betupi sereta ngangkatka industri beladang di Song.
“Aku arap nengah penemuai ke baka tu ulih muka peluang ngagai ketuai raban bansa di Song belajarka chara ba pengawa beladang ke diatur SALCRA nyengkaum nanam sawit enggau utai tanam bukai ti ulih dikemansang ba menua sida ila.
“Pemansang runding ba pengawa ngemajuka tanah sida nengah chara mai pemansang ngagai rayat di menua pesisir baka di Song ulih enchelakka mata enggau peluang ngemajuka diri ba mensia mayuh di kandang menua nya.
“Agenda ke dikerembai Kepala Menteri ti deka ngedutka seraka penyeranta entara menua pesisir enggau kandang nengeri tampak endar dipeda nengah perambu pemansang ke setipak enggau pemansang menua Malaysia.
“Kelimpah ari nya nengah pengerembai perambu, perintah ulih balat agi ngemansangka kandang menua sida nengah chara ke teratur.
“Nengah pengawa muka kandang menua baru ila, perintah ulih ngerembaika pemansang sereta muka pengawa puang ngagai peranak ba kandang menua nya,” ku iya.
Penemuai ngelama lima hari ke berengkah ari 5 nyentuk ke 9 Ogos deka nyadika pelasar ngagai rayat enggau perintah mai ubah ngagai menua Song.