SARIKEI: Pengawa ngemanahka Loji Meresi Air Bayong ke beungkus RM97 juta dipelabaka deka tembu endar digaga pun bulan Oktober taun 2015.
Pengawa ngemanahka loji nya dipejalai kena napi guna enggau peminta mensia mayuh ke majak betambah.
Menteri Perengkaguna Mensia Mayuh Datuk Amar Awang Tengah Ali Hasan madah, pengawa nya mega dipejalai kena ngisi guna peranak menua di Belawai, Tanjung Manis enggau Pulau Beruit.
“Enti udah tembu ila, projek tu ulih mekalka kapasiti ai 30 miliun liter sehari (MLD) ngagai peranak menua ditu.
“Nitih gaya ke diatu, Loji Meresi Ai Bayong ulih ngemansutka kapasiti ai urung 26.5 MLD dikena 106,505 peranak menua ditu.
“Ungkup kandang menua Sarikei, penyampau kapasiti ai ke dikena bisi peranak menua ditu ke nyampau 64,030 iku bisi 18 MLD, Bintangor 33,462 iku 2 MLD enggau Tanjung Manis 9,013 iku penguna bisi 6.5 MLD,” ku iya.
Awang Tengah bejaku munyi tu lebuh mendingka penerang maya ngabas Loji Meresi Ai Bayong ditu, ensanus.
Loji ke urung 20 kilometer penyauh ari pasar Sarikei bulih ai ari dua batang sungai iya nya Sungai Gerugu enggau Sungai Sarikei.
Ngambika bekal ai nya chukup dikena, seiti agi tekad ai udah digaga ba sungai nya ti ulih mekal kapasiti ai urung 13.97 juta meter padu.
Ku Awang Tengah, nitih gaya ke diatu Tekad Ai Gerugu ti mekalka ai ngagai loji di Bayong, chukup dikena dalam timpuh 10 bulan enti sema bisi kemarau panjai.
“Taja pia, kami ngelalau mensia mayuh ngena ai enggau chara ke mereti sereta anang masau ai,” ku iya.
Nyempulang iya Menteri Muda Perengkaguna Mensia Mayuh (Mekal Ai) Datuk Sylvester Entri Muran sereta Menteri Pemansang Infrastruktur enggau Penyambung Dato Sri Michael Manyin Jawong.