KUCHING: Bisi 20 kandang endur ti dipegai Majlis Bandaraya Kuching Selatan (MBKS) deka berengkah ngena Kamera Litar Tertutup (CCTV) ujung taun tu.
Datuk Bandar Majlis Bandaraya Kuching Selatan (MBKS) Datuk James Chan madahka tuju ngelekatka CCTV nya dikena ngurang sereta nyeliahka penyalah ti ngelanggar undang-undang.
“Kami nguji deka ngelekatka mayuh agi CCTV ba kandang endur ke dipegai MBKS, ke pemadu beguna tuju iya dikena ngurang, nyeliahka sereta ngelala orang ti ngereja penyalah baka ngelanggar undang-undang.
“Bisi 20 kandang endur dibaruh kuasa MBKS diperambu deka dilekatka CCTV tu. Pengawa ngelekatka udah berengkah dipejalai sereta dipelaba tembu ujung taun tu sereta dikena taun baru,” ku iya.
Chan mansutka pekara tu ba sebengkah aum enggau pengarang berita ti diatur ba Bilik Kaunsil MBKS ditu, kemari.
Naka kediatu bisi tiga palan bebeli barang ke dalam kuasa MBKS bisi dilekatka CCTV, ku iya.
Nitihku iya, pengawa ngelekatka CCTV nya dibantu perintah besai nengah Opis Menteri Pengelikun Mengeri, Pengawa Berumah enggau Kunsil Kandang Menua ba endur ke patut.
Kandang endur ke dilekatka CCTV baka Kenyalang Park; Primier 101, Jalai Tun Jugah; Tabuan Jaya (Bangunan Wisma Awam, Bangunan KFC, Kedai Ai Lee); Bangunan Am Bank Jalan Setia Raja; Bangunan Hospital KPJ; Bangunan Public Bank Stutong.
Bangunan Giant Jalai Canna; Chong Lin Park, Jalai Tabuan; Jalai Ban Hock; Jalai Song Tian Chok/Jalai Song Kheng Hai; Jalai Tungku Abd Rahim/Hock Lee; Jalai Padungan; Jalai Abell; Jalan Petanak/ Travillion; Batu 4 (Everise & Boulevard); Batu 3 (Center Park, Pasar Lama Batu 3, Jalai Rock) enggau Yoshi Square Jalai Pelabuhan.