DEKA DISADUNG: Ai mineral ditepu ngagai lori sebedau disadung ngagai mensia mayuh ba Parlimen Saratok.
SARATOK: Beberapa buah stesyen minyak Shell udah nyadung 1,250 kotak ai mineral ngagai peranak menua Seratok apin lama ke udah.
Pengawa nya dipejalai atas tanggungpengawa rama, kelebih agi ngagai peranak menua nya ti dituntung penusah suntuk ai, pia ku James Ting ke mega Chairman program nya.
Ku iya ba pelilih mit Saratok sida udah nyadung 670 kutak ai mineral lalu ba Roban (250 kutak), Genturung Pendiau Sessang (370 kutak) enggau Kabong (330 kutak).
“Batang tuju kami meri bantu kena ngelempungka tating pengidup peranak menua nya laban ke suntuk ai ba kandang menua nya dalam kandang beberapa minggu ke udah.
“Taja pan gaya ke dipeda nyau majak manah lalu sekeda kandang menua udah bisi ai tang ba sekeda endur baka di Kabong enggau sekeda endur bukai ba kandang nya mengkang suntuk ai.
“Kami udah sepenemu deka meri bantu ke patut ngagai sida ngambika bisi dikena sida ninting hari baka nyumai enggau ngirup,” pia ku James lebuh ke berandau enggau media pengudah nyuaka bantu nya ngagai peranak menua Saratok.
Bisi 16 buah stesyen minyak Shell ke enggau ba program nya baka Empire Sdn Bhd, Hock Kuong Petrol Station, Gorgeous Trading Sdn Bhd, Hock Hou Lung, Evertask Sdn Bhd, Chiang Chuan Petrol Station, Hoe Hup Service Station, Empire Nutri Sdn Bhd, Hock Choo Hoe Petrol Station, Service Aman, Syarikat Suria, Wong Yuk Siew Filling Station, Wong Yuk Siew Service Station, MKJ Supplier, Chop Lung Kai, Chen Yii Enterprise, Li Hua, Best Ply Sdn Bhd enggau Wirajaya Enterprise.
Ku sapit chairman program nya madah, Amelia Tiu, program nya sebengkah ari atur pengawa ke dipasuk ba kalendar ninting taun serakup nya.
“Taun tu kami udah milih musibah penanggul suntuk ai nyadika agenda kami nyuaka bantu pengelantang pendiau enggau rama ngagai mensia mayuh.
“Program ti berambaika leka jaku ‘Shell We Care We Share’ tu dipelanja 16 buah stesyen minyak Shell ari Sibu, Selangau, Sarikei, Kanowit, Jakar enggau Bintangor,” ku iya.
Bela bisi maya nya, Pemancha Sahari Gani, Kaunsilor Gapor Ahmad, Kaunsilor Alwie Sapalie enggau Lim Kheng Huat.