Anda di sini

Menua Sarawak mengkang likun

Advertisement

ENDA NANGI: (Ari kiba) Merle enggau Ferdi enda nangi enggau kes bunuh ke udah nyadi nya.

KUCHING: Temuai ari menua tasik enda nangi enggau kes munuh dua iku nembiak ke mati dipantap ti benung belajar ba bidang berubat ke nyadi ba Jalai Abell ketegal belaya pengudah ngirup arak.

Ferdi Urlings, 56 enggau Merle Urlings, 40, ke duduk ba sukut sebuah kedai seberai jalai endur penusah nya nyadi madah ngagai The Borneo Post seduai enda nangi ninga berita nya laban penusah ke baka nya tau nyadi ba sebarang endur.

“Pekara ke baka nya nyadi ba semua bandaraya. Kami enda irau ati tauka nangi. Enti udah datai ba maya parai, nadai ku enggau meh,” pia ku Urlings.

Seduai ke datai ari menua Holland madah, ba Amsterdam, pengawa ke bepantap nya bisi aja nyadi ninting lemai.

Taja pan dilalau ejensi dagang temuai sida di Holland ngambika bejejaga kelebih agi maya malam hari, tang Urlings tetap madahka Sarawak sebuah menua ke manah sereta likun.

“Kami udah nemuai ngagai Mulu, Miri, Sibu lalu diatu datai ba Kuching. Rayat ditu manah, gaya pengidup manah lalu rampa menua pan manah.”

“Insiden ke baka nya nyadi di serata dunya. Kekadang bisi nyadi pekara ke manah lalu kekadang bisi mega nyadi pekara ke enda manah. Pekara ke baka nya sama bisi nyadi di serata dunya”.

Pengudah nemuai sereta nujah serata menua Sarawak dalam kandang tiga minggu ke udah, Urlings ke datai di Sarawak kena 22 Julai sereta deka bekejang ari tu kena 9 Ogos. Lebuh ke pulai kin ila seduai deka ngelakuka menua Sarawak ngagai bala pangan bukai ngambika sida nemuai kitu.

Berebak engau nya, Frans Larooi, 56, ke sama asal ari Holland ke bisi mansa endur penusah nya nyadi arapka nadai nenama nyadi.

“Lebuh berundingka pekara ti nyadi ke semak enggau hotel endur kami diau, bisi berasai nangi mimit“ pia ku Larooi ke deka nemuai ki tu ngelama seminggu.

Pengudah nemuai ngelama tiga minggu baka ngagai Langkawi, Pulau Pinang enggau sekeda endur bukai di Semenanjung Malaysia, iya madah menua Malaysia tu menua ke likun.

Josta de Lange ke betemu enggau Larooi laban ti bemalam ba hotel ke sama madahka diri nadai berasai nangi lebuh ti nemuai ngagai Kuching, seraya mantaika penyinu ati iya ngagai apai indai nembiak British ke dibunuh nya enggau apai indai saspek.

“Ukai semina apai indai nembiak ke dibunuh nya aja ke berasai sinu ati tang apai indai saspek nya berasai tusah ati,” ku de Lange.

Berekas bungai mega bisi dipeda diengkahka ba palan penusah nya ke nyadi. Sarawak Economic Development Corporation (SEDC) ukai semina mantaika penyinu ati sida nengah bungai ke dianjung kia aja, tang besembiang ba endur nya semalam kena meri basa ngagai dua iku ke nembiak British ke dibunuh dia.

Advertisement