Dikarang Judan Bungap //
SELANGAU: Pengawa lumba enggau main sebengkah program ba sekula ti patut dikemeratka bala apai indai nembiak kelimpah ari pekara pelajar.
Kaban Kunsil Nengeri (ADUN) Tamin Datuk Joseph Mauh Ikeh madah, dua bengkah pekara nya tau nentuka pemujur nembiak ba sekula.
“Bisi mega sekeda ari bala apai indai enda tentu rindu meda anak sida chakah ba pengawa lumba enggau main laban nangika tau ngeruga pekara pelajar anak diri.
“Tang sida enda nemu pengawa lumba enggau main ti diatur sekula mega seiti ari pekara ti nentuka pemujur seiku-seiku nembiak sekula,” pia ku iya.
Iya mantaika jaku nya maya bejadika ‘Program Membara Membantu Rayat (MEMBARA) P.214 Selangau Sukan Rayat ba Skim Sekuau, Selangau, empai lama tu tadi.
Program sehari nya bela digulu Pemesai Opis Pekara Khas (JASA) Sibu Elisa Jaboh, Chairman Komiti Program Tuai Rumah Dominic Daud, Kaunsilor Dr Ali Puji, Kaunsilor Andrewson Ngalai, bala tuai raban bansa, tuai-tuai rumah enggau bala bukai.
Nampung jaku iya baru Mauh mega ngelalau nembiak sekula patut nemu magi awak ba pekara pelajar enggau lumba enggau main.
“Taja pan pia, nembiak empu meseti landik ngaga pelin baka ni magi awak sida belajar laban nangika sida kelalu mayuh bebuaika jam ba pekara lumba enggau main taja dua bengkah pekara tu bela mai reti ke besai ba pemujur pelajar.
“Berindik ari pekara nya, apai indai anang kelalu enda ngibuhka ke anak ngambika ulih meri peransang ngagai sida mujur ba dua bengkah pekara tu,” ku tandu iya.
Berebak enggau tu, Elisa ngarika opis sida meri besai terima kasih ngagai Mauh enggau bala pemesai nyengkaum tuai raban bansa ke bukai laban ulih ngelimpangka diri datai ngulu program nya.
Penatai bala pemesai ku iya ulih nyungkak agi pengeransing bala mayuh rinduka pengawa lumba enggau main kelimpah ulih nyintalka agi kaul enggau pangan diri.
Mauh mega bisi diberi basa nyuaka perais ngagai bala ke mujuh bulih lumur ba pekit ke bisi diatur ba program sehari nya.