SRI AMAN: Rayat ditesau ngambika enda mudah bebagi sukung ngagai perintah Barisan Nasional (BN) awakka projek pemansang ke udahd perambu dipejalai enggau mujur ba nengeri tu.
Menteri Muda Pemansang Menua Pesisir enggau Pengawa Berumah Datuk Francis Harden Hollis madah, semua raban bansa patut terus nyukung ketuai BN awakka projek pemansang enda tejanggal.
“Perintah chukup begunaka sukung semua kita laban enti nadai sukung ari rayat, perintah ke diatu tentu pedis deka meri projek pemansang ba sesebengkah endur. Pekara ke bansa tu nyau ngasuh pemansang lubah datai,” ku iya.
Harden ti mega nyadi Kaban Kunsil Nengeri (ADUN) Simanggang madah munyi nya rambau bejadi Aum Besai Parti Sa’ati Rayat Sarawak (SUPP) Pampang Pantu ditu kemari.
Iya madah, kerejasama ari mayuh raban bansa deka ngemuntangka perintah bejalaika pemansang ba dini-dini endur.
“Rayat patut pintar milih ketuai ke ulih ngemansangka pengidup rayat enda ngira sekalika sida nya diau ba kandang mengeri tauka ba menua pesisir.
“Aku pechaya, rayat deka meda pemansang betampung…nya alai anang bebagi sukung ngagai perintah awakka pemansang ba nengeri tu enda tejanggal,” ku tandu iya enggau nyemetak.
Harden ti mega nyadi Chairman SUPP Pampang Simanggang madah, rayat patut beratika baru pemujur ke udah digaga BN dalam ngemansangka nengeri tu nengah mayuh bengkah projek pemansang enda ngira nya besai tauka mit.
“Pekara tu terang mandangka semina perintah BN aja ke ulih mai ubah ngagai rayat lalu nadai kebuah rayat deka nulak pemansang ke dibai perintah BN,” ku iya.
Berebak enggau nya, Harden bisi ngelalau rayat awakka nulak semua jaku petenah ke dibai raban penyakal laban nya endang sebengkah ari chara sida dikena ngulihka sukung rayat ngagai sida (penyakal).
“Semua kitai ulih meda, rayat enda mudah pechaya enggau chara ke dikena sida nya laban rayat udah nemu berunding ni bagi utai ke manah tauka jai,”ku iya.