SIBU: Seiku orang dagang bisi ngaga ripot polis pengudah berasai enda puas ati meda perengka dikena ngelimat kuasa karan ke dibeli iya ari seiku pengari kompeni ke nyual perengka nya ba sebengkah supermakit besai ditu empat bulan ke udah.
Kena 9 April tu tadi, orang dagang ke beumur 53 taun nya dipinta tukang penyual barang nya meli perengka dikena ngelimat kuasa karan nya dalam penyampau 20 peratus.
Ba ripot iya, orang dagang nya madah tukang penyual barang nya madah sida iya ngembuan pemendar ari SESco dikena nyual perengka nya.
Pengudah tekait ati ninga jaku tukang penyual barang nya, orang dagang nya terus meri lapan iti perengka dikena ngelimat kuasa karan nya enggau rega RM399 seiti.
Nitihka penerang orang dagang nya, tukang penyual barang nya madah sida meri jamin deka mulaika duit nyema perengka nya enda ulih ngurangka penyampau bayar karan dalam timpuh tiga bulan.
Orang dagang nya madah diri bisi nguji mulaika perengka nya ngagai tukang penyual barang nya lebuh sida nya ngatur roadshow ba sebengkah pasar di Sungai Merah kena 25 Jun tu tadi.
“Sida (tukang penyual barang) besemaya deka mulaika duit aku dalam timpuh sebulan udah nya tang nyentuk ke sehari tu bayar pampas pan bedau diterima,” ku iya.
Nitihka penerang orang dagang nya, iya mega bisi nunjukka perengka nya ngagai seiku kaban ke gawa nyadi juruleletrik lalu iya tekenyit ninga kaban iya madahka perengka nya langsung enda ulih dikena ngelimat kuasa karan.
“Nangkan ke nya, kaban aku madah rega perengka nya seiti enda sampai RM30,” ku iya.
Irau kediri udah kena tipu tukang penyual barang nya, orang dagang nya terus ngaga ripot polis bekaul enggau pekara nya tengahari ensana.
Iya mega madah deka mai kes nya ngagai Komiti Minta Pampas Pengguna enda lama agi.
Penyampau pengerugi ke udah diasaika orang dagang nya lebih RM2,000.
Iya ngarapka pengguna bukai enda alah kena tipu tukang penyual barang ke suah dipeda ngelakuka barang sida ba sebelah supermakit tauka ba palan bukai.