Kaul antara kita (rayat enggau perintah) meseti teguh
SARIKEI: Menteri Muda ba Opis Kepala Menteri (Ngelakuka Pelajar Teknikal), Datu Haji Len Talif Salleh madah, pemanah kerejasama entara pupu raban bansa endang sebengkah ari chara ke pemadu beguna awakka pemansang terus tejamin.
Iya madah, endang udah nyadi juluk perintah deka meda pengelantang pengidup semua rayat lalu enggai meda pendiau sida nya nadai dikibuh.
“Rayat patut terus nyukung perintah awakka pemansang terus betampung lalu enda mudah tinggal dibelakang baka ke disepi maya menua tu bedau merdeka.
“Pemanah kaul antara kita (rayat enggau perintah) meseti teguh. Rayat patut nyukung perintah lalu perintah mega patut terus mendingka sebana rayat,” ku iya.
Len madah munyi nya rambau pengerami ‘Malam Jalinan Mesra Aidilfitri 2014’ kediatur ba Dewan Suarah Sarikei, ditu malam ensana.
Nya alai, awakka juluk majak nyadi nyata, ku Len, rayat patut besaup ngetanka perintah Barisan Nasional (BN) ke endang udah nyengala dipeda ulih mai rayat nyepi pengidup ke lebih lantang.
Nya alai, rayat enda patut mendingka jaku penyakal ke deka nganti perintah.
“Perintah BN endang seruran ngamatka semaya enggau batang pengawa ke endang udah diberi orang ke ngatur menua. BN seruran manah bejalaika perambu pemansang,” ku iya.
Iya madah, perintah seruran ngemeratka pengelantang pendiau rayat sereta naka ulih nentuka nama utai ke udah diperambu tau meri penguntung ngagai semua lapis pengidup rayat.
Tambah mega, ku iya perintah chukup ransing ngangatka tikas pelajar rayat. Nengah chara ke abnsa nya, rayat ulih idup lantang sereta ngasaika pengidup ke lebih nyamai.
“Ungkup pekara pelajar, kitai bisi numbuhka Wang Turu Pelajar DUN Belawai. Berindik ari nya aku ngerah semua kita guna peluang tu enggau manah-manah,” ku iya.
Ba pekara bukai ke besangkut paut, iya mega minta sukung ke nadai bebagi dikena nyapai juluk pemansang ke udah diperambu ngelama tu.
“Pemansang enda nyadi tekala nya enti nadai kaul ke manah entara semua orang,” ku iya.
Sama bisi datai Sekretari Politik Kepala Menteri, Dayang Raoyah Abang Adeng, Pemesai Jasa Bagi Menua Sarikei, Ahmat Adai enggau Chairman Opis Kunsil Pelilih Sarikei, Chan Pan Pan.