Anda di sini

Pemutus Malaysia nikika rega tol patut diperatika enggau berat, ku Masing

Advertisement

KUCHING: Rega tol ke bisi niki lalu dibayar kerita lebuh masuk ngagai  menua Singapura maya nengah tol di garis antara menua Malaysia enggau Singapura ngangkut orang gawa ari Malaysia ngagai Singapura semina atur pengawa ke nadai tentu meri untung, ku Menteri Pemansang Tanah Tan Sri James Masing.

“Jangka aku, Malaysia deka tulihka mayuh agi penguntung enti orang Malaysia ke gawa di Singapura enda ibuh mayar tol tauka enti mayar pan, mayar ba rega ke umbas iya.

“Tambah mega, sida ke gawa di Singapura nya, endang mai penguntung ngagai Malaysia laban duit gaji sida iya dibelanja di Malaysia.

“Lalu baka nya mega ke orang Singapura lebuh masuk ke Malaysia enda patut enda diperansang masuk Malaysia laban mayuh rayat Singapura tu enti masuk ke Malaysia, sida iya pan bebelika barang di Malaysia. Enti tol ditikika rega, iya semina ngurangka orang ari Singapura bebelika barang di menua kita,” ku Masing madah nengah ‘whatsapp’ ngagai Bilik Berita.

Iya nandu baru, Malaysia patut betatika pekara tu enggau berat, laban enti ulih, peratika pekara tu dalam penemu ke mai pemaik ngagai kededua bengkah menua (Singapura enggau Malaysia) ke jemah ila.

Belabuh ari 2 Ogos tu tadi, bas ke tama ngagai Malaysia diasuh mayar tol RM13.30 ba Johor Bharu Checkpoint di Malaysia (pulai-mansang), iya nya penyampau ke lima kali ganda ditikika ari rega ngelama tu, ke semina mayar RM2.30.

Peniki rega tol nya nyengkaum semua bansa kereban pengangkut, nyengkaum sida ke ngena kerita kediri empu, ke mayar RM16.50 ari RM2.90 (pulai-mansang).

Bedau lama tu tadi, Malaysia udah madahka deka nikika rega tol berindik ari Singapura ke ngaga pemadah deka nikika bayar permit ungkup kerita ari menua luar masuk ngagai menua nya (Singapura) ari S$20 sehari ngagai S$35.

Berindik ari peniki rega tol nya, rayat ari kededua bengkah menua berasai enda lantang ati.

Nitihka rikod Malaysia, urung 310,000 mensia mayuh pulai mansang ninting hari gawa  ke Singapore enggau Malaysia.

Baka rayat Singapura, sida ke nyadi rayat ke pengabis mayuh bejalai ke Johor Bharu maya ujung minggu bebelika barang, makai sereta raun.

Urung  200,000 rayat Malaysia ke gawa di Singapura, kereja kilang enggau sektor servis, lalu bisi mega nembiak Malaysia ke belajar di Singapura, pulai mansang ari Johor Bharu.

Kemari (2 Ogos), mensia mayuh ke patut nurun gawa lalu bas ke patut mai penumpang mansa garis antara menua nya bisi ngaga bantah pasal rega tol ke udah niki, ke ngujungka sepemanjai jalai nuju ngagai Singapura nya sekut, lalu sekeda sida ke patut nurun gawa ngena pengangkut kediri empu, enda ngena kerita tauka motosikal sida iya, tang bejalai kaki ngelawa Singapura.

Advertisement