KAPIT: Sapit Menteri Pemansang Menua Pesisir enggau Kandang Menua Malaysia Datuk Alexander Nanta Linggi madah, semua rayat patut bebasaka pemesai reti pengawa ti dipejalaika gerempung ukai dikuasa perintah (NGO) bepun ari sida lebih agi Kelab Lion ke chakah mantu mensia mayuh enggau pengelurus ati.
“Aku pechaya, kaban Lion mayuh pengawa dipejalai, ukai semina mantu orang tasah angus, bah tang sida mega udah mujur matak raban nembiak masuk kelab tu sereta belajar nulung mensia enggau enda bebayar lebuh tasah.
“Bandingka enti sida tu nadai dalam kelab nya, raban nembiak tu enda ngasaika awak mantu orang bukai enggau enda bechiping,” ku Nanta ba pengawa ngenetapka kaban Lion ti Ke-22, 2014 ditu Hari Enam tu tadi, ke digulu urung 250 iku kaban kelab enggau mensia mayuh.
Nanta mega madah, taja pan menua kitai udah bisi mansang tang sekeda agi begunaka bantu lalu kaban Lion mih orang ti jampat agi ngulurka bantu.
Taja pan Kapit enggau Song bandar mit tang penyampau kaban Lion ari raban ke biak ditu udah ngayanka sida chakah bebantuka orang lebih agi lebuh maya tasah seraya berambaika leka jaku ‘Meri Bantu’ ngagai semua.
Ku nanta, di menua tasik, lebuh ngiga pengawa puang, orang ti minta kereja nya dulu deka nemu nama tanggungpengawa rama (CSR) ti bisi dipejalaika kompeni nya sebedai sida minta pengawa.
“Pengereja pengawa ngemeratka bengkah CSR ti patut dipejalaika kompeni ti endur sida gawa ukai semina ngemeratka untung aja,” ku Nanta.
Berebak enggau nya Nanta muji pemanah pengawa kaban kelab Lion ari Kapit enggau Song laban besaup mantu orang ti begunaka bantu sida sebarang maya tasah.
Iya mega muji kelab nya ketegal udah ngatur program ke endur sida meresa pengerai mensia mayuh, Ngambika bisi dikena kelab bejalaika pengawa, Nanta bela ngungkupka RM5,000 ngagai kelab Lion Kapit enggau Song.
Legit pengawa malam nya ke alai Yong Hua Sying dientap nyadi presiden kelab Lion Kapit lalu Hung Haw Hui nyadi presiden kelab Lions Song sereta District Governor 308-A2, iya nya Dato’ Betty Wong Yieng.