KUCHING: Pemutus milih menua ke alai mutarka pechara kes bilun Malaysia Airlines (MAS) MH17 ke ditimbak lalu labuh di Ukraine kena 17 Julai tu tadi patut diperundingka enggau manah ngambika pulaika pemaik ngagai mansa ke bisi kena tuntung penusah nya.
Menteri ba Opis Menteri Besai Nancy Shukri bisi madah, Malaysia enggau Ukraine ukai nyadi kaban Kot Jenayah Antarabansa (ICC), enti dibanding enggau menua Belanda ke endang nyadi kaban ICC.
“Menua ke alai ngatur pechara nya bedau dipilih, agi bepanggai ngagai pansik. Enti pemutus pansik tepedaka lebih manah dipejalaika (pengawa bechara) di Malaysia, nyadi orang ke ngereja penyalah nya deka didawa ba menua tu.
“Enti pemutus madahka manah agi pekara nya didawa ba menua bukai baka ba Belanda, nyadi kitai nyerahka pekara nya ngagai Belanda, utai ke lebih beguna iya nya pemutus milih menua ke alai ngatur pechata nya ila deka meri pemaik ngagai semua orang ke udah dituntung penusah,” ku iya.
Iya madah munyi nya ngagai pemberita rambau pengerami ‘Rumah Terbuka Aidilfitri’ ke diatur iya empu ba Librari Nengeri Sarawak, Petra Jaya kemari.
Rambau pengerami nya urung 5,000 iku pengabang bisi datai ngabang ngagai rumah Nancy.
Berebak enggau nya, Nancy bisi madah Luyar Menua Tan Sri Abdul Ghani Patail ke ngarika Malaysia diatu begulai enggau komiti pemansik penusah MH17 tetap ngaduka pansik ke pemadu manah sekalika ngatur pechara orang ke ngereja penyalah nya ba dalam menua tu tauka ba menua bukai.
“Taja Malaysia ukai kaban ICC, ukum ke deka diberi ngagai orang ke ngereja penyalah nya agi ulih dipejalaika ba menua tu. Kitai agi bisi ungkup baka nengah Akta Kesalahan Keselamatan (Langkah-Langkah Khas) 2012 (SOSMA),” ku iya. — Bernama