SRI AMAN: Menteri Muda Betanam Betupi (Pemansik enggau Dagang), Datuk Mong Dagang ngelalau bansa Iban ke jadi enggau bansa bukai ngetanka adat asal diri awakka enda punas.
Ku Mong bansa Iban ke jadi enggau bansa bukai tau ngujungka adat asal bansa diri punas laban enda dikemeran sereta enda dikemerat.
Ambika chunto baka ngajat, nya sebengkah ari main asal bansa Iban ke tebilang lalu ajat nya patut ditanka semua bansa Iban taja pan sida jadi enggau bansa bukai dudi ila.
“Tentuka adat asal bansa Iban dikerembai ngagai nembiak rebak dudi taja pan jadi enggau bansa bukai.
Enti enda pia, adat nya deka punas maya datai ba rebak nembiak ke jauh dudi agi ila,” pia ku iya bejaku ba pengerami Nyuaka Setipikit Kelas Ngajat 2014 ke diatur Serakup Adat Asal Iban Sri Aman (PBISA) ditu, empai lama ke udah.
Seraban 47 iku udah masuk ba Kelas Ngajat ti dipejalaika Chairman PBISA, Johnathan Issau.
Mong mega minta serakup adat asal di nengeri tu regas agi ngiri penemu ngagai bansa Iban sentang pemerat guna adat asal bansa ti diturunka ngagai nembiak rebak baru enti sema sida jadi enggau bansa bukai.
Iya ke mega Kaban Kunsil Nengeri (ADUN) Bukit Begunan ngelalau bansa Iban ditu ngambika regas agi ngemeranka pengawa nenun.
Ku iya, orang Iban di Kapit regas amat ngereja pengawa nya, nya alai orang Iban di Sri Aman mega patut ngemeranka pengawa nenun.
“Aku arapka peranak menua bansa Iban ditu ngemeranka pengawa nenun lalu nyadika nya sebengkah ari chara ngulih penatai pemisi ungkup ruang bilik sida dudi ila,” ku iya.
Bela bisi ngulu pengerami nya Pemesai JASA Parlimen Sri Aman Whelton Lumpoi, Pemantu Khas Kaban Parlimen Lubok Antu Kaunsilor Zainie Aji enggau Pemantu Khas Kaban Parlimen Sri Aman, Edmund Pirang.