SRI AMAN: Kaban Parti Sa’ati Rayat Sarawak (SUPP) pampang Simanggang, Lingga, Pantu enggau Engkilili dilalau ngambika terus ngetanka penegap parti.
Chairman SUPP pampang Simanggang Datuk Francis Harden Hollis madah, penegap nya beguna amat dikena parti sida terus mengkang diterima sereta bulih sukung ke manah ari mensia mayuh ba kandang menua nya.
Nangkan ke nya, iya madah kaban ari empat bengkah pampang nya patut mandangka pengeransing ati ngeringka parti ba kandang menua sida.
“Aku minta semua kita mengkang bebendar ngeringka parti awakka parti tu ulih beretan dalam BN belama iya,” ku iya rambau aum besai SUPP pampang Simanggang ditu apin lama ke udah.
Kelimpah ari nya, Harden ti mega nyadi Menteri Muda Pemansang Menua Pesisir enggau Pengawa Berumah minta kaban SUPP ari empat bengkah pampang nya ngiarka pengasai ati deka ngulihka penguntung diri.
Runding ke bansa nya beguna amat ngambika parti SUPP mengkang keringa ba tikas pampang sereta enda mudah dikeruga sapa-sapa orang ke nguji nyekat singkang sida, ku iya.
“Keringka semengat kitai. Anang mudah mendingka jaku orang bukai ke nguji mambarka penyerakup kaban SUPP,” ku Harden.
Bela bisi datai rambau aum besai SUPP pampang Simanggang tu iya nya Chairman SUPP pampang Engkilili, Kapitan Kueh Aik Seng, Temenggong Tan Chong Meng, Pengulu Lee Siang Hua enggau tuai raban bansa ke semak menua Sri Aman.