KUCHING: ADUN Krian Ali Biju ngansak mayuh agi konteriktor diberi kereja nganjung ai ngagai peranak menua di Saratok.
Nyadi sebengkah chara ngemutar penusah semantara, iya madah perintah patut enda ngarapka dua tiga konteriktor aja bejalaika pengawa mekal ai di Saratok ketegal sida enda ulih nangkup semua pinta ari rayat Saratok diatu.
“Perintah patut nyiri mayuh agi konteriktor lalu enda kelalu bepanggai ba dua tiga konteriktor aja.
“Kelalu mimit konteriktor ngujungka sida napi kelalu mayuh pinta ari rayat ninting hari,”ku iya lebuh dirandau The Borneo Post kemari.
Iya dipinta meri jaku senentang sebana rayat Saratok ti ringat enggau atur pengawa Opis Kereja Raya (JKR) sereta konteriktor ke udah dichiri ti enda bejalaika atur mekal ai enggau menuku.
Diberita , kebuah bebatang ti ngujungka rayat ringat iya nya konteritor udah enda bejalaika pengawa mekal ai enggau adil.
Saratok napi penusah suntuk bekal ai ke pemadu besai lalu paip ai udah kering pengelama 3 minggu.
Ali mega ngansak JKR nambah penyampau tubuh pengereja pengawa ejensi nya ke alai iya pechaya penyampau ke diatu enda chukup nangkup tanggung pengawa ke besai maya ke diatu.
“Opis Pelilih Menua patut numbuhka komiti pengintu bekal ai ngambika ulih matau semua pengawa mekal ai. Sida mega patut numbuhka siti palan ‘focal point’ ngambika bisi endur rayat minta tulung,’ku iya.
Kelimpah ari nya, iya madah semua 1,000 iti tangki ai ke puang ke bisi dismpan di JKR patut diagih enggau adil ngagai genturung pendiau berumah, rumah panjai, pasar, sekula enggau opis.
Ketegal maya ke diatu pun ‘fenomena El-Nino’ Ali ngansak semua ejensi nyikap diri napi sebarang penusah ke tau nyadi.