KUCHING: Taja pan perintah deka terus mai pemansang sereta pemisi pengari rayat nyadi jematan meri bantu enggau sukung, rayat menua pesisir kelebih agi indu Dayak enda tau enda belajar ngereja pengawa ngatika diri, ngambika sida iya ulih betapi enggau sebarang pemar ke datai.
Lebuh ngemansutka penemu nya, Ketuai Indu Parti Rayat Sarawak (PRS) Senator Datuk Doris Sophia Brodie madah, kemaya hari tu orang indu betapi enggau mayuh macham pemar lalu muntang endar dikemulaka orang ke ngena chara ke enda manah ngemba sida.
“Bisi pengawa sekeda orang ke nguji ngusutka runding kitai dalam hak kitai nyadi orang menua tu sereta kebuah kitai bisi dalam Malaysia, lalu bisi mega pengawa orang ke nguji ngachau semangat begempung dalam Barisan Nasional (BN), lalu bisi mega nya, pengawa orang luar masuk ngagai menua pesisir nguji deka ngelemi sereta nusutka runding.
“Peratika utai bansa tu nyadi, rayat menua pesisir enda tau enda ngetanka kubu kita lalu negutka hak kita. Anang semina duduk jenuh ngenatka diri lalu nyerah alah tang enda ngetanka hak kita. Anang enda bejaku ngambika penemu kitai bisi didinga.
“Giga penemu, pengelandik sereta gawa bagas agi dikena belajar nyukung sereta bebasaka pangan diri. Badu nyimpan runding kepapas enggau pangan diri laban enti kita empu enda belajar muai ulah bansa nya ba diri empu, baka ni ku kitai ngarapka orang bukai bebasaka kita,” ku iya.
Iya madah munyi nya lebuh bejaku ba atur pengawa Makai Lemai beserimbai enggau Kimpin Ngiga Kaban Baru Wanita PRS bedau lama tu tadi, ti diatur ulih Indu PRS pampang Simanggang.
Lebuh muji pengawa Indu PRS pampang Sri Aman ke udah bebendar ngatur pengawa nya, serayaka ngiga kaban baru parti, Doris ngelalau semua kaban PRS kelebih agi bala indu, pengawa nya ukai semina nambah pemayuh kaban tang ke batang iya, sida ke diambi nya enda tau enda bekunsika visi, tuju sereta pemerat parti.
“Kitai enda tau enda gawa enggau bebendar agi lalu anang kelalu enggai kiruh, tang kemansangka diri empu awakka meri pemaik ngagai orang bukai enggau rayat menua pesisir.
“Enti kita nanya aku baka ni, ku aku, kitai meseti gawa enggau runding ke betul sereta ngereja pengawa kitai enggau naka pemanah laban enti kitai ngereja pengawa kitai bansa nya, kitai ukai semina ngemanahka agi pengelandik kitai tang ke batang, peneleba ti di ulih kitai nya, ngajar kitai nyadi orang ke landik, ulih besemekih enggau orang bukai sereta ngembuan penemu,” ku iya.
Sama bisi nguluka atur pengawa nya, Kaban Parlimen (MP) Sri Aman Masir Kujat, Ketuai Indu PRS pampang Simanggang Lai Siew Tan, Sekretari Politik ba Opis Kepala Menteri, Majang Renggie enggau Angeline Umih sereta Pemancha Samuel Lawen.