Pekara tu nyengkaum pekayan, pemakai, adat lama, main asal enggau mayuh agi ke bukai, ku Harden
SRI AMAN: Kaban Kunsil Nengeri (ADUN) Simanggang, Datuk Francis Harden Hollis deka meda main asal pesaka bansa mengkang ditan laban nya ngembuan pendiau ke diri empu, main asal pesaka bansa nyengkaum adat lama enggau pendiau pengidup pupu raban bansa di menua tu.
Nitihka penemu ke dipansutka Harden, pekara tu nyengkaum pekayan, pemakai, adat lama, main asal enggau mayuh agi ke bukai iya ke bisi mandangka pendiau sesebengkah bansa sereta adat lama ke mandangka pemayuh raban bansa ke nguan menua Malaysia.
“Ambika banding, penyelai pekayan tradisional ke ngembuan mayuh gaya chura enggau chara ngena mandangka main asal raban bansa kitai ke bela ngayanka pemanah budi basa dalam pendiau pengidup bansa kitai di menua tu,” ku iya.
Nya alai, ku iya main asal nya patut ditan ngambika terus ditampung raban bansa diri empu dudi hari, kebuah pia laban nengah main asal tradisional, kitai ulih nemu penatai asal raban bansa ngambika bansa kitai enda mudah ditinggalka pia aja.
Iya madah munyi nya rambau bejadi pengerami ‘Malam Budaya Cheongsam dan Pakaian Kitar Semula’ ke diatur Nembiak Gerempung Hopoh Bagi Menua Sri Aman bepalan ba Dewan Suarah ditu malam tadi.
Berindik ari nya, iya mega bisi nesau semua raban bansa kelebih agi sida ke agi biak bebasaka chara ngena enggau maya ngaga pekayan tradisional awakka selalu ngena sereta belajarka pesaka lama nya ngambika enda punas nyentukka jemah ila.
“Aku ngarapka program ke bansa tu ulih ngidupka baru pengerindu ngena pekayan tradisional lalu pengawa ke bansa tu ulih ngidupka baru pendiau kitai enggau nyungkak penatai pemisi rayat,”ku iya.
Harden ti mega nyadi Menteri Muda Pemansang Menua Pesisir enggau Pengawa Berumah madah, pengawa nguna baru barang ke udah dibuai ulih meri pemanah ngagai rampa menua.
Iya madah, pekara pelajar endang beguna amat dikena meri penemu sentang pemesai reti nyaga pemanah rampa menua ba sida ke nembiak.
“Nengah penemu ke bansa nya, rebak baru ulih besaup nyaga pemanah rampa menua sereta mutarka penanggul ti besangkut paut enggau isu-isu rampa menua.
“Nya alai, ba penemu aku manah agi reban rebak baru kelebih agi sida ke agi besekula diberi penemu bekaul enggau pemesai reti nyaga pemanah rampa menua ngagai pengidup semua mensia,” ku tandu iya.
Sama bisi datai ba pengerami nya, Temenggong Sii Toh Peng, Presiden Gerempung Hopoh Bagi Menua Sri Aman, Pengulu Lee Siang Hua, Pengulu Lee Thong Sen, Chairman Pengatur Program, Hwang Chiew Sia sereta bala tuai-tuai raban bansa ke bukai.
Rambau pengerami nya, Harden bisi madah diri deka meri bantu RM 11,000 dikena gerempung nya bejalaika aktiviti sida sepemanjai taun.