Dikarang Jacqueline David //
Ukai semina endur ngerembai ideologi politik, iya tau nyadi palan pemansang adat, penyungkak ekonomiBAU: Palan Komuniti Parti Tindakan Demokratik (DAP) Mas Gading (Zon Singai) diatu udah dibuka sereta dipenyadika Chairman DAP Sarawak Chong Chieng Jien kena malam Hari Empat tu tadi.
Dalam jaku pemuka iya, Chong arap bendar palan nya deka nyadi sebengkah pusat ukai semina endur ngerembaika ideologi politik ngagai peranak menua pesisir lebih agi di sitak Mas Gading (Zon Singai) di Kpg Sagah, Singai, Bau tang iya mega tau nyadi Rumah Gawai Tradisional ke mandangka adat Bidayuh Singai.
“Tu sebengkah projek ke ngasuh kitai temegah ati, laban iya ukai semina endur komuniti ngemansang sereta ngerembaika penemu, berandau, begempuru tang kami mega ngajar chara ngulihka jalai ti tau nyungkak penatai pemisi komuniti Singai,” ku Chong.
Iya madah projek ti deka dipejalaika, iya nya projek kraf jari alai bala indai di genturung pendiau dia tau belajar ngaga kraf nya lalu ngulihka pemisi diri empu.
“Kraf jari nya enti digaga, patut bisi kelai sereta gambar ‘Roket Ubah’ ngambika muntang dijual ngaga parti kitai di semenanjung din.
“Aku nyamin enti kraf jari nya ngembuan gambar sereta kelai ‘Roket Ubah’, kaban parti kitai di semenanjung din tentu deka meli enggau penyampau ti mayuh,” ku iya.
“Tu bida entara DAP enggau Barisan Nasional (BN), kitai bejadika projek laban kitai deka ngelantangka rayat lalu nambah ke nya, kita empu ulih nyungkak penatai pemisi diri,” ku iya.
Iya nandu baru, berebak enggau pengawa BN ke beberika duit ngagai rayat lebih agi maya bepilih tauka BR1M tang DAP enda baka nya, tang mayuh agi ngajar rayat ngulihka penatai pemisi kediri.
“Kitai ngulihka, kitai berasai temegah ati laban nya asil kitai empu, untung kitai empu, lalu ukai diberi orang bukai. Tu ke dikumbai integriti, kitai temegah ati laban pemisi nya diulih ngena titik peluh diri,” tandu iya.
Pemansang ekonomi berat ke rayat, lalu enti ninting bulan bisi belanja masuk, rayat enda begunaka duit maya bepilih.
“BN meri duit aja tang maya pengawa bepilih aja, tembu pengawa bepilih, nadai sida ingatka kita. Maya nya meh kitai diasuh ngiga duit kediri empu laban sida (BN) semina datai meri duit maya bepilih aja, tang enti penatai pemisi kitai setidi, nadai kitai begunaka duit bepilih nya,” ku iya lalu nambah, pengawa BN beberika barang sereta duit tu enda ulih dikena dalam timpuh ke panjai jemah ila.
Kelimpah ari nya, Chong madah Palan Komuniti Parti Tindakan Demokratik (DAP) Mas Gading (Zon Singai) ukai semina alai ngaga kraf jari aja, tang rumah nya mega tau dikena temuai ari menua luar diau nyemilik.
“Temuai ari menua luar datai diau di palan tu pan tau nyadi meri asil ngagai kitai, lalu asil nya pulai baru ngagai komuniti Singai.
“Baka tu meh ke dikumbai tanggungpengawa perintah, iya nya meri pengaya ngagai rayat, ukai chara beberika duit. Chara meri pengeraja ngagai rayat, iya nya ngatur jalai ngiga pemisi kediri empu” ku iya.
Ba atur pengawa nya, Chong ti mega kaban kunsil nengeri (ADUN) Kota Sentosa enggau Kaban Parlimen (MP) Bandar Kuching madah, DAP Sarawak bisi autonomi diri empu, mutuska ni ke manah ungkup Sarawak.
“Enti Parti Islam SeMalaysia (PAS) agi bingking deka ngaga undang-undang ‘Hudud’, DAP Sarawak deka ningkilka diri ari Pakatan Rakyat. DAP Sarawak bisi autonomi ngaga pemutus kediri empu ungkup Sarawak.
“Enti DAP Sarawak ngaga pemutus bansa nya, DAP di semenanjung 100 peratus setuju enggau pemutus kami. Taja pan DAP nya parti nasional tang DAP Sarawak bisi autonomi iya empu,” tandu iya.
Sama bisi ngulu atur pengawa malam nya, sereta sama bisi bejaku, iya nya Mordi Bimol (ex-chalun DAP pengawa bepilih parlimen di sitak Mas Gading), DAP Serian Edward Luak, Leon Jimat Donald (DAP Sri Aman) enggau ADUN Batu Kawa Christina Chiew.