Anda di sini

Raban Indu Dayak diperansang malutka diri ba pengawa dagang

Advertisement

MIRING: Pasang (kiba) enggau Jawi (tengah) benung miring minta berekat lebuh ti bejadika salun nya.

SIBU: Mayuh agi Indu Dayak diperansang malutka diri ba pengawa dagang laban sida jauh mimit enti dibanding enggau indu ari bansa bukai.

Kaunsilor Pasang Ngalambai madah, mayuh indu Dayak ke bisi ati deka bedagang tang tebal agi sida nadai pengelandik kena ngepunka dagang.

“Bisi mar mimit indu wanita Dayak deka ngepunka dagang sida. Taja pan perintah bisi nyendiaka mayuh macham sukung ari segi belanja kena mantu indu Dayak tang penyampau sida mengkang mimit,” pia ku iya madah lebuh bejadika kedai salun rambut ditu empai lama ke udah.

Ku Pasang, agi mayuh utai enda tau enda dikereja perintah enggau gerempung ukai dikuasa perintah (NGO) kena mantu indu Dayak ngambika sida mujur malutka diri ba pengawa dagang.

Iya mega meransang sida ke udah mujur ba pengawa dagang besaumka peneleba enggau chara sida ulih mujur enggau indu Dayak ke bukai.

“Pasal belanja nya sebengkah ari penanggul besai ke ditapi indu Dayak, taja pia mengkang mayuh enda nemu chara minta bantu ti disediaka perintah baka nginjau duit ari MARA enggau TEKUN,” ku iya.

Kelimpah ari nya, dagang ti deka dipejalaika sida patut dipilih enggau manah.

Ku iya, dagang ke dipilih nya patut ke ulih dikereja sida lalu ukai tererunda nitihka pemujur orang bukai.

“Anang meda orang bukai mujur ba sesebengkah dagang, kita pan deka ngereja dagang ke sebaka. Seiti ari kebuah orang dagang Bumiputera enda mujur ba pengawa dagang laban rindu nitihka tauka muka dagang sebaka enggau orang bukai,” ku iya.

Ku iya baru, semua bansa dagang ti dipejalaika sida enda tau enda dikereja enggau bebendar.

Bela bisi dia maya nya, Kaunsilor Jawi Anom.