Dikarang Rengenyan Labang
NYUAKA BANTU: Awang Tengah ngarika PUSAKA enggau anak kompeni nya nyuaka bantu ngagai sebengkah gerempung, seraya diperatika Sarudu (kiba) enggau Julaihi (tiga kiba). — Gambar Chimon Upon
KUCHING: Perbadanan Kemajuan Perusahaan Kayu Sarawak (PUSAKA) enggau anak kompeni iya kemari udah mujur meri bantu RM263,000 ngagai 58 buah gerempung pengintu pengelantang pendiau enggau gerempung ukai dikuasa perintah (NGO).
Penyampau bantu enggau penerima bisi nambah enti dibandingka enggau taun 2013 ke alai maya nya penyampau bantu bisi RM253,000 lalu semina 56 penerima.
Bantu nya kemari disuaka Menteri Pengatur Pemansang Pengeraja Asal enggau Rampa Menua II ti mega nyadi Chairman Lembaga Pengurusan PUSAKA Datuk Amar Awang Tengah Ali Hassan.
Ba pengerami nya iya madah, PUSAKA ukai semina ngemeratka industri bepelasarka kayu ramu tang mega beratka tanggungpengawa rama.
“Dalam timpuh ke sama kami bejalaika tanggungpengawa rama (CSR) baka seharitu PUSAKA enggau anak kompeni meri bantu ngagai 58 buah gerempung pengintu pengelantang pendiau enggau NGO. Kami arapka bantu tu ulih dikena bejalaika atur pengawa sida,” ku Awang Tengah.
Bantu nya pengawa rama (CSR) diberi PUSAKA enggau anak kompeni ninting taun, berengkah ari taun 1982.
Tuju iya dikena nyukung gerempung bejalaika atur pengawa seraya mantu raban ti kurang bepenatai pemisi.
Nambahka nya, tanggungpengawa pengawa rama ti dipejalaika PUSAKA enggau anak kompeni nya senipak enggau juluk nempa raban bansa ti bepengibuh dalam gerempung nengah tanggungpengawa rama (CSR) ngagai raban bansa.
Kelimpah ari nya lebuh ditanya bekaul enggau penusah ti nuntung bilun Malaysia Airline (MAS) MH17 ti benung dalam penerebai ari Amsterderm ke Kuala Lumpur ti terempas di Ukraine sereta nabanka semua penumpang enggau anak kapal, Awang Tengah madahka enda nyangka pekara nya nyadi sereta amat ngenyinuka ati.
“Kitai amat sinu ati ba penusah ke nyadi laban udah nabanka mayuh nyawa, kitai enda ngadang penusah tu tau nyadi. Kitai bedau nemu tegal lalu kitai nganti dulu nama kebuah pekara tu tau nyadi.
“Penyampau ke asal ari Sarawak ti nepan bilun nya bedau temu endar lalu penyampau bantu perintah (nengeri) mega bedau temu,” ku iya.
Sama bisi datai ba pengerami nya kemari, Menijer Besai PUSAKA Datu Sarudu Hoklai, Menteri Muda Rampa Menua Datu Len Talif Saleh, Menteri Muda Pengatur Pemansang enggau Beranakka Puku Datuk Julaihi Narawi enggau ke bala bukai.