Anda di sini

Peranak Indonesia ditangkap ketegal nguji mai tama senapang angin

Advertisement

DEKA DI BAI TAMA CHARA BELALAI: Isa (dua kanan) mandangka senapang angin ke dirampas polis di CIQ Tebedu ensanus ngagai pengarang berita.

KUCHING: Pasukan Gerak Am (PGA) ensanus nangkap seiku peranak Indonesia ke beumur 36 taun ti nguji mai tama 2 iti senapang angin ke nengeri tu di CIQ Tebedu.

Bejaku ba seiti aum enggau pengarang berita kemari, Komander Briged Sarawak (PGA) SAC Dato Isa Munir ngenukuka pekara nya lalu saspek diserah ngagai Balai Polis Serian ngambika di dawa nengah Seksyen 8 Akta Senyata Api.

“Ba CIQ Tebedu kemari (ensanus) raban ‘risik’ kami beratika ulah seiku lelaki ari menua sepiak ti nguji deka mai tama senapang angin ngagai menua tu.

“Lebuh entukar iya ditan, dua iti senapang angin ditemu dilalai dalam entukar ti ngujungka saspek ditangkap ke alai kes diatu diserah ngagai Balai Polis Serian ngambika ditasat enggau silik,”ku Isa.

Kelimpah ari nya, Isa mega madahka polis bisi ngerampas dua kutak sterum, duit RM8,126 sereta kad bayar telefon ari saspek.

Nyengkaum kes baru nya, PGA udah mujur ngemuntan 4 kes tauka nangkap 4 iku peranak Indonesia ti ngereja penyalah ke sama di CIQ Tebedu dalam taun 2014 tu.

Ari 4 iti kes nya, polis udah ngerampas tujuh iti senapang angin ke dipelaba deka dibai tama ke nengeri tu nengah chara belalai.

Nyaut tanya pemberita senentang atur nganjung raban polis (PGA) mantu ESSCOM (Sabah), Isa madahka penyampau raban ke dianjung udah nambah 200 iku.

“Diatu kitai nganjung dua kompeni iya nya 400 iku raban polis ngagai ESSCOM. Dulu agi ari tu semina seiti kompeni aja dianjung.

“Kena 16 Julai tu tadi, seiti kompeni ari Batalion 11 udah pulai lalu sida disilih enggau kompeni ari Batallion 12.

“Sehari tu (kemari) seiti agi kompeni ari Batalion 10 deka ngejang ke Sabah meri bantu lalu sida deka ngintu pengelikun ba kandang ESSCOM ngelama dua bulan,”ku iya.

Isa nambah, taja pan penyampau tubuh raban polis ke ESSCOM nambah 200 iku, aset tauka perengka polis ari Sarawak enda dibai.

Aset di Sabah udah chukup lalu nadai kebuah kitai mai enggi kitai di Sarawak kin. Bantu tu deka majak dipejalai nyentukka notis minta badu nganjung dikeluarka, tandu iya.

Advertisement