Anda di sini

Penumbuh UPP bepelasarka undang-undang

Advertisement

Dikarang Rengenyan Labang

 

KUCHING: Presiden Parti Rayat Sarawak (PRS) Tan Sri Datuk Amar James Jemut Masing (gambar) madah, Parti Rakyat Bersatu (UPP) ti ditumbuhka empat iku pengari rayat ti kala nyadi kaban Parti Rakyat Bersatu Sarawak (SUPP) nya endang asil ari peneka sida empu lalu bepelasarka undang-undang.

Berindik ari nya ku Masing, Dato Sri Wong Soon Koh enggau bala kaban iya mega bisi kuasa nitihka undang-undang nya.

“Nya barang ku sida deka nyereta enggau numbuhka sebarang parti politik nitihka peneka sida.

“Ba Sarawak tu kitai mayuh bengkah parti ke ulih dipilih rayat. Tang aku ngarapka pengundi ulih milih parti ti beamat ngarika aspirasi sereta amat gawa ke hak sida sereta ukai pulaika penguntung seseiku pemesai maya pengawa bepilih 2016 ila,” ku iya nengah jau pesan pandak (SMS) lebuh ditanya pasal penumbuh UPP.

Nambahka nya iya ngarapka parti nya sama teulihka pemujur dalam pengawa bepilih besai nengeri ke deka datai ila.

“Aku ngarapka UPP mujur ba taun 2016 sereta ngarapka parti tu teulihka sukung ke pemadu manah ari rayat Sarawak,” ku Masing.

Kelimpah ari nya , Penulung Presiden Kanan Parti Pesaka Bumiputera Bersatu (PBB) Datuk Amar Awang Tengah Ali Hassan lebuh dipinta meri penemu bekaul enggau penumbuh UPP, iya madahka UPP enggau Parti Tenaga Rakyat Sarawak (TERAS) udah mansutka penemu parti nya empu.

Awang Tengah madahka nitihka penerang ti udah dipansutka kededua parti nya, taja pan enda sama tang kededua iya madahka diri bakih Barisan Nasional.

“UPP enggau TERAS udah meri penerang ti chukup nyemetak pasal kuing kededua parti nya.

“Taja pan kededua iya parti politik ti bisi entiti ti bebida tang kededua iya endang Bakih BN. Tambah mega, tebal agi kaban parti nya bala Menteri enggau Menteri Muda ke udah bisi dalam BN,” ku iya lebuh ditanya raban pengarang berita ba sebengkah pengerami ditu pagi kemari.

Dalam surat kabar kemari madahka empat iku ti kala nyadi kaban SUPP ti sebedau tu nyereta TERAS udah ngaga pemutus baru numbuhka parti ti diberi nama Parti Rakyat Bersatu (UPP).

Parti UPP nya dipenyadika kemari pengudah dikemendarka kena 14 Julai tu tadi, lalu empat iku kaban UPP iya nya Kaban Kunsil Nengeri (ADUN) Bawang Assan Dato Sri Wong Soon Koh, ADUN Bengoh Dr. Jerip Susil, ADUN Engkilili Dr Johnichal Rayong Ngipa enggau ADUN Opar Ranum Mina.

“Nengah platform ke bebida kitai ulih ngiring rayat sereta meri servis ngagai peranak nengeri tu ti diarika bemacham pupu raban bansa, main asal enggau jalai pengarap,” ku Wong ba sebengkah aum pengarang berita ensanus.

Advertisement