Anda di sini

Industri kayu ramu nulung nyungkak ekonomi peranak menua pesisir

Advertisement

KUCHING: Industri kayu ramu Sarawak ulih nyungkak pemansang ekonomi ti mungkur peranak ke diau ba menua pesisir laban ti ulih nyediaka mayuh pengawa puang enggau perengka guna ngagai mensia mayuh.

Menteri Pengatur Pemansang Pengeraja Asal enggau Rampa Menua Kedua Datuk Amar Awang Tengah Ali Hassan (gambar) madahka, taja pia raban perintah mega ngemeratka atur nyaga kampung tauka rampa menua serunyut enggau arus pemansang.

“Kitai nemu industri tu ukai semina ngenatai penguntung ari sukut rega aja tang industri tu mega nyediaka peluang gawa sekalika chara terus tauka enda, ti enda kurang ari 100,000 iti pengawa puang.

“Nambahka nya, nengah industri tu mega kitai ulih muka pengentap baru di menua pesisir ke lalu ulih nyediaka perengka guna ngagai mensia mayuh ti baka jalai.

“Ambika banding, ba sitak dijaga aku, maya keterubah aku nyadi pengari rayat dalam taun 1987, menua kami nadai jalai ti nyambung ngagai sesebengkah genturung pendiau, jalai batang pan agi nadai, kami semina bedarat. Bepelasarka peneleba aku empu, deka ngelawa menua Ba’Kelalan enti bedarat ambis kurang seminggu baru datai.

“Tang nengah industri tu (kayu ramu) jalai enggau jematan bisi digaga, menua ke kelalu jauh di entigis menua ulu ke tusah dilawa nyau ulih dilawa nengah jalai batang,” ku iya.

Awang Tengah ti mega nyadi Menteri Perengka Guna Mensia Mayuh mansutka penemua iya lebuh bejaku ba ‘Majlis Penyampaian Derma Tahunan Daripada PUSAKA & Anak-anak Syarikat 2014, ti diatur ba Dewan Seminar PUSAKA, Wiisma Sumber Alam ditu, kemari.

Nangkan ke nya, iya madahka Opis Pemansang Industri Kayu Sarawak (STIDC) udah bejalaika tanggung pengawa nyediaka perengka guna dalam industri di Sarawak.

Industri Kayu Ramu Sarawak udah mansang ngerembai nyentukka eksport produk kayu ramu teulihka penguntung urung RM7 billion dalam setaun, nyauka ninting taun tetap mulaika asil ba penyampu nya, ku iya.

“Taja pan ekonomi dunya enda tentu tegap tang kitai ulih ngenegapka penyampau eksport kitai (dalam produk kayu ramu).

“Enti semua ti bekaul dalam industri tu deka terus ngangkatka pemanah produk sereta bisi nilai tambah tinggi dalam produk kayu ramu, aku arap bendar industri tu ulih terus meri penguntung besai ngagai pemansang ekonomi menua,” ku iya ti mega nyadi Chairman Komiti Pengatur Pengawa PUSAKA.

Bepelasarka penerang berita ti disadung ngagai pengarang berita kemari, penyampau eksport produk kayu ramu Sarawak naka tengan taun 2014 agi mengkang manang enti dibandingka enggau taun nyin kemari.

“Penyampau eksport produk kayu ramu Sarawak ari Januari ngagai Jun 2014 iya nya RM3.66 billion enti dibandingka dalam timpuh ke sama ba taun 2013 sepenyampau RM3.61 billion.

“Tu ngayanka penyampau nilai eksport produk kayu ramu Sarawak setengah taun 2014 nambah satu peratus tauka RM53 juta dibandingka enggau timpuh ke sama taun nyin kemari,” ku penerang nya.

Produk besai iya nya kayu batang (RM1,008 juta), kayu gergaji (RM270 juta), papan gentian (RM124 juta) enggau venir (RM110 juta).

Ba tengan taun tu produk kayu ramu Sarawak mayuh dibeli tauka dieksport ngagai menua Jipun enggau penyampau RM1,458 juta tauka 40 peratus ari penyampau rega eksport. Udah nya, tiga bengkah menua bukai ke bela bisi meli kayu ari nengeri tu iya nya India (RM702 juta), Taiwan (RM379 juta) enggau Korea (RM253 juta).