KUCHING: Urung 85 peratus orang mayar chukai dalam kandang endur ke dikuasa Opis Kunsil Kandang Padawan (MPP) udah bejalaika tanggung pengawa sida mayar.
Taja pia, Chairman iya Lo Khere Chiang mengkang ngansak orang ke bedau mayar chukai datai bejalaika tanggungjawap sida sebedau ujung taun tu.
“Mayuh pekara sereta projek udah dipejurai ke alai mayuh mega projek ngaga parit, ngemanah jalai sereta projek baru udah dipejalai.
“Kita meri puji ngagai peranak dalam kandang endur ke dikuasa MPP ti seruran ngingatka kitai sentang projek tauka pengawa meresi ke bedau dipejalai.
“Nya seiti pekara ti dikelalu kitai tang seiti agi pekara ti berat iya nya sekeda orang mayar chukai enda bejalaika tanggungjawap sida ti ngujungka penyampau chukai ke digempuru kitai tiap taun enda manggai ba ikas ke dikearap,”ku iya.
Iya mansutka jaku tu ba seiti aum pengarang berita pengudah tembu aum penuh MPP ti ke 6 di begunan MPP ditu, kemari.
Iya nambah, nadai kebuah chukai nya enda ulih dibayar ketegal penyampau chukai ke diletak MPP mit agi enti dibandingka enggau penyampau ke diletak opis kunsil di nengeri bukai.
“kitai begunaka belanja ngambika tau dikena ngemanah lampu jalai, ngemanah sereta ngaga parit baru, mayar gaji pengereja pengawa enggau pengawa bukai,’ku iya.
Ambika chunto, pekara ke nyadi ba menua Australia, Lo madah penyampau chukai ke diletak seruran nambah ninting taun ke alai rayat diberi awak milih sekalika deka mayar chukai nya tauka mindah ngagai kandang endur bukai.
Ku iya, MPP mereti diak peranak ke diau di menua pesisir enda ulih mayar chukai enti penyampau ke diletak majak niki ninting taun.
Taja pia, iya enda nyangkal penyampau chukai engka deka ditiki jemah tang enda mega ngemedis rayat.
Chukai kala ditiki 1 peratus ba taun 2009.
“Penyampau chukai ti udah digempuru MPP kenyau ari taun 1980 nyentukka 31 Mei taun tu iya nya RM12 juta.
“Rayat enda pechaya, 15 peratus ngenataika RM3 juta setaun ari chukai ke digempuru.
“Tajapan kitai bisi meri diskaun 50 peratus ngagai orang mayar chukai tang penyampau ke digempuru semina nambah RM2 juta ba taun 2013 enti dibandingka enggau Rm1.4 juta ba taun 2011,”ku iya.