Dikarang Chris Bishop //
Awakka peranak Sarawak lantang ati
KUCHING: Chairperson Parti Seati Rayat Sarawak (SUPP) Pampang Kuching Datuk Lily Yong Lee Lee madah, kebuah rayat enggai nyukung parti nya ukai ketegal parti enda bejalaika pengawa enggau manah tang ketegal enda rinduka sekeda polisi enggau gaya politik ke benung nyadi jam ke diatu.
“Parti enda teulihka pemutus ke manah ba pengawa bepilih nengeri ungkup timpuh dua renggat ke udah sereta mega ba pengawa bepilih besai lalu nya ukai ketegal kitai enda manah bejalaika pengawa ngagai rayat.
“Enda ngira manggai ba ikas ni pemanah nuan ngereja pengawa, SUPP tetap alah ketegal rayat enggai meda kitai, rayat enda lantang enggau gaya politik ke nyadi jam ke diatu lalu nya meh ti udah ngujungka sida nulak SUPP,”ku iya.
Iya mansutka jaku tu lebuh dikerandau pemberita pengudah bejadi Pengawa Nikika Tambai SUPP Nyerumba Genap 55 Taun Penumbuh SUPP Pampang Kuching di Padungan ditu, kemari.
Yong nambah, SUPP maya ke diatu patut majakka bebendar agi ngereja pengawa ungkup rayat baka ke udah dikereja kenyau penumbuh parti 55 taun ke udah.
“Ketuai kitai ke dulu ke mega orang ke udah numbuhka parti udah nurunka tanggung pengawa nya ngagai kitai.
“Pengawa manah, titihka pemanah servis baka ke dikereja sida ke dulu ngagai rayat nya meh patut ditampung kitai lalu enti semua ngembuan runding ke bansa nya tentuka parti ulih tegap, lalu aku pechaya SUPP deka dikerindu rayat baru,”ku iya.
Iya mega madah rayat deka pulai nyukung SUPP baru enti sekeda polisi diubah lalu nitihka pinta enggau peneka rayat Malaysia kelebih agi peranak Sarawak.
Ngenang sentang timbal komuniti China sentang Kepala Menteri ke baru, Yong madah bansa China udah meri timbal ke positif.
Taja pia, iya madahka Kepala Menteri ke baru patut diberi timpuh endur iya mutarka sekeda isu.
“Komuniti China baka ke dipeda aku udah meri timbal ke positif lalu kitai patut meri awak ngagai Kepala Menteri endur iya beratika sekeda isu ke ditapi kitai.
“Pekara politik enda ulih diputar dalam timpuh sebulan, kekadang begunaka timpuh ti panjai lalu kitai deka meri kerejasama enggau sukung,”ku iya.
Pekara ke diguna iya nya kitai patut ngembuan pengelurus maya meri servis ngagai rayat, ku tandu iya.