Opis Residen, Pelilih Menua enggau JKM sedia mantu
KUCHING: Orang kampung kelebih agi ketuai ke nyaga kandang menua nya empu dipinta madah lengkas ngagai Opis Residen tauka Opis Pelilih nyema dituntung penusah suntuk ai berindik gaya hari ti kelalu angat ba nengeri tu.
Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah madah, Opis Residen enggau Opis Pelilih endang komiti ba peringkat bagi menua ke patut berumban minta bantu ke diguna sida.
“Aku deka meda orang kampung kelebih Tuai Rumah datai madahka penanggul penyuntuk ai ke nuntung kampung diri empu beserimbai enggau musin kemarau tu ngagai Opis Residen, Pelilih Menua tauka ngagai Opis Pengintu Pengelantang Pendiau Raban Bansa (JKM) ngambika bantu bekal ai ulih disadung enggau jampat,” ku iya lebuh dirandau kemari.
Ku Fatimah, enti nadai orang madah bala sida pedis deka nemu bagi kampung ke dituntung penanggul ai berindik ari gaya hari ti kelalu angat jam ke diatu.
Nangkan ke nya, ku iya enti sida nadai nerima penerang nya meh ke ngujungka kampung nadai nerima bantu ai.
“Kami patut nemu dini endur kampung nya, berapa pintu ruang bilik ke suntuk ai lalu patut dibantu enggau lengkas,” ku tandu iya.
Berebak enggau nya, iya madah opis menteri iya deka bekerejasama enggau Opis Kereja Raya (JKR) bejalaika pengawa nyadung ai ngagai rayat ke bisi dituntung penanggul suntuk ai.
Iya madah, ngagai kampung tauka rumah panjai ke ulih lawa nengah jalai alun, raban sida deka nyadung ai botol ngagai sida dituntung suntuk ai.
“Orang kampung ke semina bepanggai ngagai bekal ai ujan lalu dituntung suntuk ai, raban kami deka manti meri ai botol 1.5 liter penyampau 12 botol ungkup sepintu ruang bilik dikena sida nyumai enggau ke diirup dalam kandang seminggu.
“Nyema kemarau enda badu kami deka nganjung ai baru ngagai sida ke dituntung penusah tu,” ku iya.