KUCHING: Palan Serakup Indu Sarawak (SFWI) udha mujur bejadika bup serakup nya ke diberi nama ‘Seiring Sejalan’ ke dipenyadi bini Kepala Menteri, Puan Sri Dato Jamilah Anu ba Kompleks Kot Lama ditu, minggu seiti nyin tadi.
Chairman Menua SFWI, Aishah Ederis madah, bup nya ukai semina ngingatka ulang taun penumbuh gerempung ukai dikuasa ulih perintah (NGO) nya tang mega nyadi tanda basa ngagai orang ke lama agi udah megai serakup nya laban sida udah mayuh mantu ngemujurka NGO nya.
“SFWI sigi sebuah palan ke negapka pemerat indu bepun iya ditumbuhka dalam taun 1962, lalu bup tu chara kami meri basa ngaga bala orang indu di belakang SFWI dalam kandang lima dekad tu ke udah,” ku Aishah.
Iya mega madahka kebuah sida iya ngatur pengawa nya ba Kompleks Kot Lama laban beguna nya empu sebuah palan ke mayuh ngundan sejarah.
“Begunan Kot Lama tu udah mayuh alai nyadi pengawa besejarah, kenyau iya dibuka dalam taun 1874. Kami ngasaika palan tu endang setipak endar alai bejadika bup tu, laban penumbuh SWFI udah bisi di menua tu dalam 50 taun, lalu tu seiti pemujur ngagai SFWI,” ku iya.
Projek bup nya nyadi pemungkal kerejasama ngagai tim SFWI dibaruh Sub-Komiti Media bechairmanka Esther Bala-Gala, ti mega nyadi mandal chairman gerempung nya.
“Bup tu mantaika raban pemesai indu nyengkaum ex-‘First Lady’, Toh Puan Datuk Patinggi Hajah Norkiah, Penyanding Penemu SFWI ti mega nyadi seiku raban ‘Country Women of the World’ (ACWW) ke kala nyadi presiden dunya gerempung nya, Dato Ursula Goh enggau ex-Penyanding Penemu Dato Rugayah Abdul Majid, ti mega nyadi pengereja pengawa keterubah gerempung tu,” ku Esther.
Esther mega madahka dalam bup nya mega bisi ngundan profil pemesai indu bukai nyengkaum raban politik enggau ex-menteri kabinet baka Datuk Hajah Sharifah Mordiah Tuanku Fauzi.
SFWI nyadika peransang dalam nyikap penemu orang indu di Sarawak ba mayuh bengkah bidang nyengkaum mantu ngelatih orang indu di menua tu nyadi orang dagang kelebih agi dalam pengawa ngaduka asil pengelandik jari, nyumai, ngaga kuih sereta bejait.
SFWI mega udah mayuh mantu ngemansangka orang indu dalam pekara pelajar, nyadi pengereja pengawa di opis perintah, politik, pengawa rama enggau ekonomi.
Sukung sereta dikelala ulih Perintah Menua udah mayuh mantu lalu ngujungka SWFI nyapai objektif ngangkatka penuduk indu dalam menua tu.
Tanggung pengawa ba sida ke indu dalam komuniti, opis perintah, enggau politik udah mayuh nambah, taja pan belubah-lubah tang enti diperati penyampau pemayuh pemesai indu naka kediatu, lalu beratika pemansang pelajar ba nembiak indu, pemayuh nya dijangka deka nambah udah tu.
“Perintah Menua meri sukung penuh ngagai palan Komiti Indu enggau Kunsil Indu berindik ari perambu ke udah digaga SWFI dalam taun 1983.
“Tu ke pengabis nyulut laban enda mayuh sitak menua dalam Malaysia udah nyapai tikas tu,” ku Aishah.
Entara pemesai indu ke bisi enggau datau ngulu pengawa tu iya nya, Menteri Pemansang Orang Indu, Ruang Bilik enggau Raban Bansa Dato Sri Rohani Abdul Karim, Menteri di Opis Menteri Besai (Pekara Undang-undang) Nancy Shukri, enggau Presiden Serakup Indu Dayak Sarawak (SIDS) Dato Sri Empiang Jabu.