SARATOK: Bisi 192 pintu ruang bilik ari Kampung Perpat, ditu udah nerima bekal ai mineral ke disadung Opis Pengintu Pengelantang Pendiau (JKM) apin lama ke udah.
Tuai Kampung iya, Madeli Darahman,65, madah kebuah ai nya diberi berindik ari penanggul ai ke nuntung rayat ba menua nya ketegal gaya hari ti kelalu angat ba endur nya kenyau beberapa minggu ke udah.
“Ngelama tu, rayat ditu semina bepanggai ngagai ai ke ditimbun dalam tangki tauka ngena perengka bukai, lebuh maya hari bisi ujan.
“Tiap kali musin kemarau, penanggul endur ngambi bekal ai beresi endang nyadi sebengkah penusah ke balat nuntung rayat ba endur tu,” ku Madeli.
Berindik ari penanggul nya, ku Madeli rayat deka mantaika sebana ngagai raban orang ke betanggungjawap awakka ulih meri bantu nyema musin kemarau nuntung baru dudi hari.
“Ngelama tu, rayat endang nganti penganti bekal ai disadung ngagai rayat ba kampung tu, lalu kami diatu berasai nyamai mimit laban udah bisi diberi ai dikena napi musin kemaru ke benung nyadi diatu,” ku iya.
Iya madah, berindik ari gaya hari ke nadai ujan ngujungka rayat ba endur nya pedis deka bulih bekal ai beresi lalu penatai raban JKM Saratok dipeda chukup ngemeratka penanggul ke benung nuntung orang kampung lalu pemeri ai nya chukup besai reti ngagai sida.
“Beserimbai enggau bulan ramadhan tu orang kampung endang beguna amat ke ai dikena nyumai, mandi enggau guna bukai.
“Nyema kemarau enda ngetu, orang kampung nanggika diri putus bekal ai lalu kami ngarapka raban JKM ulih terus mantu rayat ditu,” ku iya.
Nitihka pengari JKM, nengah bantu 820 kutak ai mineral nya ngarapka rayat ba KampungPerpat enda bangat tusah ati udah tu.