Anda di sini

Gembar pengerami enggau aktiviti ke meri penguntung

Advertisement

Dudi hari nadai salah digembar enggau pengawa nyuaka anugerah penyulut ngagai orang ke jelai rita

SARIKEI: Menteri Pemansang Rama Tan Sri William Mawan Ikom ngelalau semua aktiviti ke bepelasarka pengerami patut digembar enggau pekara ti meri pangka ngagai semua orang, ukai ungkup sebengkah raban aja.

Iya madah, pengawa tu beguna amat dikena nentuka nadai orang ngasaika diri kena tinggal, tang bela ngasaika penguntung ari aktiviti tauka pengerami ke bisi diatur.

“Ambika chunto, sekeda aktiviti ulih digembar enggau pengawa dagang baka muka kaunter tauka palan ke ulih alai orang ngulihka penatai pemisi.

“Berebak enggau nya, aktiviti nya patut digembar enggau pekara ke ulih meri peransang ngagai raban pelajar baka pengawa meri insentif. Pengawa tu ulih dikerembaika agi ngagai bala pengajar ke nyadi tiang pemun ngagai pemansang dunya pelajar.

“Nengah pengawa tu, iya mega ulih ngerintis seiti pekara ke ulih mai ngagai pemanah raban orang ke nya ke nyadi tiang pemun ngagai menua dudi hari,” ku iya.

Iya madah munyi nya rambau Pengerami Ngiling Bidai Renggat Menua Sarikei ba Dewan Suarah Sarikei, malam ensana.

Pengerami nya digulu lebih kurang 400 iku orang nyengkaum pengari opis perinyah enggau gerempung ukai perintah (NGO).

Mawan ti mega nyadi Kaban Kunsil Nengeri (ADUN) Pakan merambu ngasuh raban orang ke ngatur program nya nambahka pengelandik sida nengah aktiviti ke bisi diatur kelebih mungkur pengawa main asal enggau pengerami.

“Nyema ngelama tu kitai semina beratika pekara besai ke besangkut paut enggau pengawa beperindang aja, nyadi dudi hari nadai salah bisi digembar enggau pengawa nyuaka anugerah penyulut ungkup orang jelai rita kelimpah dikaitka enggau batang pengerami ke diatur.

“Kitai deka genap pengerami ke diatur nya patut bisi ubah ke baru sereta maju, kelebih agi ari sukut aktiviti ke diatur,” ku Mawan.

Udah nya, Residen Menua Sarikei Dahim Nadot ba jaku pengelalu madahka, pengerami Ngiling Bidai endang sebengkah pengerami ke besai reti ngagai bansa Dayak.

“Pengerami nya sebengkah ari jalai dikena raban bansa Dayak ngerapit kaul enggau pangan diri. Dudi hari, kami udah merambu deka ngatur mayuh agi program ke sebaka dikena ngerichahka agi pengerami ke bisi diatur ba menua tu.

“Utai ke dikearapka kami diatu iya nya awakka raban bansa nyukung penuh program ke diatur,” ku iya.

Nangkan ke nya, Dahim madah, berebak enggau nya mega raban opis Residen begulai enggau sekeda raban NGO udah merambu deka numbuhka Palan Main Asal Dayak ba bagi menua tu.

“Guna palan tu alai kitai ngatur pengawa enggau ngerembaika main asal bansa Dayak.

“Perambu tu udah kami engkah dalam Langgur Pemansang Malaysia Ke-11 (RMK11) ngambika diperunding lalu kami ngarapka iya ulih ditumbuh enda lama agi laban taba iya udah bisi,” ku tandu Dahim.

Mayuh bengkah aktiviti bisi diatur nyerumba pengerami nya baka pengawa miring, bebiau, diperindang raban artis, mandangka main asal lama, enchabut tiket benasit, makai malam, ngetas ranyai enggau pekit Kumang.

Advertisement