Laban pengawa betanam betupi chara moden ulih nyungkak penatai pemisi
JULAU: Raban nembiak ba menua pesisir patut berunding iya nya nguji ngemansangka diri dalam bidang betanam betupi chara moden enggu juluk ke besai nyadika batang pengawa dikereja sida.
Presiden Serakup Dagang enggau Industri Dayak (DCCI), Datuk Joseph Salang Gandum madah, pengawa betanam betupi chara besai ulih ngasilka penatai pemisi ke besai nyema dikereja enggau meruan.
“Opis Betanam Betupi seruran meransang raban nembiak nguji ngemansangka diri ba bidang betanam betupi nyadika batang pengawa dikereja sida. Laban mayuh palan endur belajar, minta ajar enggau bantu belanja disedia ngagai sida ke bisi pengerindu.
“Berebak enggau nya, orang tuai mega patut meri peransang ngagai raban sida tu nguji ngemansangka diri ba bidang betanam betupi,” ku iya rambau bejadi Aum Besai Ninting Taun Ke-19 Gerempung Orang Bumai Kandang menua (PPK) Julau/Pakan, lemai kemari.
Sama bisi datai Chairman PPK Julau/Pakan, Anyie Deng.
Kaban Parlimen Julau nya mega madah, seiku indu tengan iya umur ari sebengkah rumah ba Pakan tau bulih asil RM5,000 sebulan ari pengawa nyual lada ke dikereja iya.
Betanam betupi chara moden ku iya, ukai semina ngereja pengawa betanam tauka nupi jelu ungkup guna diri empu, tang dikereja enggau chara besai awakka nyungkak penatai pemisi.
Salang ti mega nyadi Chairman Kunsil Penyanding Penemu 1Malaysia Zon Sarawak mega madah, iya udah nguji betanamka lada dikena meri peransang ngagai sida ke biak-biak.
Ngenang sentang PPK, Salang madah gerempung nya beguna amat dikena mantu raban orang bumai kelimpah nyaga rega komoditi awakka meri penguntung ngagai bala kaban gerempung enggau rayat mayuh.
“Aku bisi ditusuika Anyie iya nya maya pengerami Gawai Dayak tu tadi, gerempung udah nulung nurunka rega manuk idup ke dijual.
“Pedagang kedai runchit nyual manuk tu enggau rega RM15 seiku tang gerempung bela seati mutuska penemu nyual manuk enggau rega RM13 seiku.
“Tu ngujungka pedagang kedai runchit tepasa nyual manuk enggau rega ke sebaka RM13 dikena ngemujurka dagang sida,” ku iya.
Kaban Parlimen Julau nya mega merambu ngasuh PPK ngatur pekit dikena nentuka PPK ni ke pemadu manah ari sukut atur pengawa enggau produk ke dipansutka sida.
Pekit nya ku iya deka meri peransang ngagai genap PPK bebendar gawa awakka meri penguntung ngagai semua orang.
Nangkan ke nya, Anyie madah, PPK Julau/Pakan bisi bulih penguntung RM29,000 ba taun siti nyin kemari.
Iya mega ngarapka PPK Julau/Pakan deka majak mayuh bulih penguntung taun tu, kelimpah deka berundingka perambu muka Kedai Runchit 1Malaysia ba Julau.