Anda di sini

Ngiling Tikai enggau Ngiling Bidai

Advertisement

Dua bengkah pengawa ke bisi bida ba raban bansa Dayak 

Dikarang Rengenyan Labang //

PENGAWA Ngiling Tikai enggau Ngiling Bidai iya dua bengkah pengerami ke suah didinga diintu raban bansa Dayak lebih agi bansa Iban lalu ke diatu nyau bisi diintu opis-opis perintah, kompeni sereta Komiti Pemansang enggau Pengelikun Kampung (JKKK) mega bisi ngatur pengawa nya kelimpah ba rumah panjai dikena ngelai Pengerami Gawai Dayak ti diintu ninting 1 Jun tiap taun udah abis.

Taja pia tiap kali pengerami nutup Gawai, pekara bekaul enggau Ngiling Bidai enggau Ngiling Tikai tu selalu dipetalatka kitai Iban, laban bisi sekeda ngembuan penemu madahka dua bengkah jaku tauka pengawa nya pekara ti sebaka lalu sekeda madahka nya pengawa nya pekara ti bebida.

Kitai Iaban tu endang bisi adat, nitihka adat enggau main asal dua jaku enggau pengawa tu iya nya Ngiling Bidai enggau Ngiling Tikai tu pekara ti enda sebaka.

Pengawa Ngiling Bidai tu suah dikereja kitai enti udah tembu Gawai besai baka lebuh kitai bisi nirika kelingkang, mengap sereta diintu dalam timpuh dua ngagai tiga malam, udah tembu bidai ke dianchau ba Gawai besai nya deka digiling.

Tang Ngiling Tikai dikena nutup Gawai ti mit ke diintu enda lama baka Gawai Dayak, laban maya Gawai Dayak kitai ngerembai tauka nganchau tikai ba ruai, nya alai nya dikumbai Ngiling Tikai.

Tikai ke digiling nya digaga ari rutan, bemban tauka mayuh macham tikai ke bukai.

Tang bidai tu digaga ari tikai rutan ti dianyam beselat lambar enggau kulit tekalung tauka ribis tauka temeran (nitihka sebut sesebengkah menua). Temeran nya dibelah  nyadi lambar bidai ke dianyam beselat enggau rutan ti disebut dianyam tunggal.

Bekaul enggau dua jaku enggau pengawa tu, Utusan Borneo bisi ngerandau Jimbun Tawai ke udah kala nyadi Pengajar Nyulut Jaku Iban, lalu diatu iya gawa nyadi Penulung Pemesai Pemansik Sosial ba Majlis Adat Istiadat (MAIS), pasal Ngiling Bidai enggau Ngiling Tikai.

Nitihku penerang Jimbun, iya madahka dua jaku enggau pengawa nya kebendar iya bisi bida.

Enti tikai nya digiling reti iya Ngiling Tikai, lalu enti bidai ke digiling ba pengerami nya nya baru dikumbai Ngiling Bidai.

“Utai ke dikumbai ngiling bidai enggau ngiling tikai tu dua iti pengawa ti enda sebaka.

“Ngiling Bidai tu dirami dikena nutup gawai besai baka Gawai Kelingkang, Gawai Kenyalang enggau Gawai besai ke bukai, Gawai diintu  dua ngagai tiga malam lalu pengawa mengap mega bisi diatur, ba ujung Gawai nya dia bidai nya deka digiling.

“Ngiling Tikai tu diatur ba pengerami gawai ti mit baka Gawai Dayak, maya nya tikai ke digaga ari bemban enggau rutan sereta ke bukai dianchau, lalu tikai nya deka digiling nyadika tanda nutup pengerami lalu dikumbai Ngiling Tikai,” ku iya.

Iya madahka bidai tauka idas nya dikena orang kelia mandung padi kena nyimpan padi sebedau disimpan dalam tibang, laban kelia nadai pelastik.

Nyadi maya Gawai dikumbai orang nganchau bidai laban iya besai ngambika lebuh dientum orang ke nimang pengap bidai nya enda pesuk laban rumah orang kelia begelegarka buluh, ku iya.

Nya alai orang ke ngatur pengerami Ngiling Bidai nya patut ngenukuka ke digiling nya endang bidai, lalu pia mega enti tikai ke deka digiling dikena nutup Gawai, nya tau dikumbai Ngiling Tikai, ngambika adat enggau main asal kitai Iban enda bebalut.

Timpuh tauka pengelama ngintu Gawai Dayak tauka kemaya pengawa Ngiling Tikai mega entara pekara ti suah didinga nyerumba pengerami Gawai Dayak.

Enti nitih, timpuh endur ngiling tikai Gawai Dayak enda patut kelalu lunggar enggai ke nadai agi ngembuan reti ngagai bansa kitai Dayak.

Diatu sekeda pengerami Ngiling Tikai bisi diatur ba bulan Oktober, Disember, Januari, nya nyau kelalu lunggar.

Pengawa Ngiling Bidai ke dikena ngelai Gawai Dayak udah abis, enti nitih anang ngelui ari sebulan.

Dalam taun 2012 suba, Menteri Pemansang Rama Tan Sri William Mawan Ikom maya bejadika pengerami Ngiling Tikai ba Rumah Matu Dingun, Sungai Sawa, Jalai Engkamop madahka mayuh bengkah isu bekaul enggau adat asal Iban patut dipejuraika nyengkaum timpuh tauka pengelama ngintu Gawai Dayak.

“Ba penemu iya, pengerami ngintu Gawai Dayak umbas iya diatur dalam timpuh sebulan aja.

“Gawai Dayak endang disambut kena 1 Jun ninting taun, lalu maya ke chukup engkeman endur ngatur pengerami Ngiling Tikai aruh ditetapka kena 30 Jun,” ku Jimbun.

Nangkan nya, iya madah naka ke diatu, lalu bedau ditetapka ni pemanjai timpuh nyambut pengerami Gawai Dayak tauka kemaya awak pemadu patut endur ngatur pengerami Ngiling Tikai diatur.

Ari buah penemu Jimbun empu madahka, timpuh Gawai Dayak patut diintu dalam kandang sebulan lalu udah nya Pengerami Ngiling Tikai patut diatur sebedau tauka kena 30 Jun.

“Pekara sentang Pengawa Ngiling Tikai bisi disebut maya aum MAIS, lalu jam endur ngintu pengerami Ngiling Bidai disadang digaga 30 Jun, tang pekara tu bedau nyentuk bendar,” ku iya.

Advertisement