Dikarang Rengenyan Labang //
KUCHING: Sarawak Medical Service Union (SMSU) mujur nerima gelar ‘Kesatuan Harmoni 1Malaysia’ beserimbai enggau pengerami Hari Pekerja 2014.
Presiden SMSU Rigar Kimmai madahka, gelar nya diterima maya ngintu Hari Pekerja ke diatur di Melaka, kena 21 Jun tu tadi lalu deka nyadika peransang ngagai sida ngambika terus chakah agi bejalaika tanggung pengawa.
Kelimpah ari nya, SMSU bisi nerima tropi, setipikit enggau duit RM5,000.
“Kami SMSU udah teulihka gelar ‘Kesatuan Harmoni 1Malaysia’ ti diberi Opis Menteri Sumber Mensia sereta disuaka Menteri Besai beserimbai enggau Pengerami Hari Pekerja 2014 ke diatur di Melaka.
“Aku ngasaika penyulut tu asil ari pemanah pengawa bala exco enggau kaban gerempung dalam timpuh tiga taun sebedau tu, ti udah bebendar bejalaika pengawa baka bekaul enggau pemeri sereta pemansang, lalu ukai semina ke pemanah kaban (gerempung) tang nyengkaum pupu raban bansa enggau perintah.
“Dikearapka gelar ke diterima ari Opis Menteri Sumber Mensia tu deka nyadika peransang ngagai semua kaban gawa lebih bebendar sereta ngemanahka agi pengawa diri ngambika bulih mayuh agi nerima gelar taun dudi,” ku iya.
Rigar mansutka pekara nya dalam aum pengarang berita pengudah tembu aum kaban exco ti digulu chairman, sekretari enggau tukang wang ari semilan bengkah pampang SMSU, ti diatur ba sebengkah hotel ditu, kemari.
Nya gelar ti kedua diterima SMSU, laban sebedau tu dalam taun 2009 SMSU bisi nerima gelar gerempung ti pemadu nyulut ari CUEPACS.
Nambahka nya Rigar madahka SMSU deka ngintu Genap Taun ti Ke-50 penumbuh gerempung nya.
“Kena 9 September 2014 tu, SMSU genap 50 taun, nya alai kami bisi perambu ngatur pengerami ngintu Genap Taun ti Ke-50 di Sibu kena bulan September tu.
“Kami nesau semua kaban gerempung awakka sampal datai maya nya ila, laban mayuh atur tauka aktiviti dipejalaika maya nya ila,” ku iya.
SMSU di serata Sarawak bisi 6,000 iku kaban ti dipasuk semua kategori pengeraja pengawa ba opis pengerai di Sarawak.
Gerempung tu nesau semua ke bedau ngerejister diri nyadi kaban patut ngerejister diri laban mayuh penguntung diulih ari nyadi kaban SMSU baka skim insuran, premium insuran, perais diberi ngagai anak ti nyulut dalam pelajar, pengintu pengelantang enggau mayuh penguntung ke bukai.
Semilan pampang SMSU naka ke diatu bisi ba Kuching, Serian, Sri Aman, Sibu, Kota Sentosa, Sarikei, Bintulu, Miri enggau Limbang.