SARIKEI: Bisi 169 iti VCD Lagu Iban ari artis dalam menua enggau 547 iti DVD filem menua luar udah mujur dirampas raban penerit adat ari Opis Dagang Dalam Nengeri enggau Pekara Bebeli Barang (KPDNKK) pampang Sarikei ba sebengkah operasi munaska aktiviti chelak tiru, apin lama ke udah.
Pemesai KPDNKK Sarikei, Ganda Jirap madah, operasyen nya udah dipejalaika ba serata bandar tu, berindik ari kompelin ke bisi digaga kompeni pengerikod lagu-lagu Iban apin lama ke udah.
“Pemujur pengawa nya mega asil ari operasi munaska aktiviti chelak tiru ke udah dipejalaika ngagai tiga buah kedao ke bisi nyual VCD enggau DVD ba mengeri tu, iya nya ba Jalai Masjid, enggau dua buah agi ba Jalai Abdul Rahman.
“Penyampau asil rampas tu bisi RM5,270. Kes tu deka dipansik nitihka Akta Perihal Dagangan 2011, Perintah Perihal Dagangan , (Label Cakera Optik) 2010 4 (4)(a), (Per. 4 (4)(a)PPD (LCO)2010),” ku Ganda rambau aum pengarang berita ke diatur ba Opis KPDNKK pampang Sarikei, lemai ensana.
Ganda madah, operasi tu udah dipejalaika begulai enggau tujuh iku pemesai KPDNKK ari Kuching enggau lima iku pemesai penerit adat ari KPDNKK pampang Sarikei.
“Nyema ditemu nyengala salah, orang nya ulih ditinggang ukum mata duit RM 100,000 tauka tiga taun jil tauka dua bengkah ukum nya.
“Nyema agi ditemu ngereja penyalah ungkup kedua kali, orang ke ulih ditinggang ukum mata duit RM 200,000 atauka jil enam taun tauka dua bengkah ukum nya.
“Ukum ungkup raban Body Korporat, ba penyalah keterubah sida ulih ditinggang ukum RM 250,000 enggau RM 500,000 ungkup penyalah ti kedua kali,” ku iya.
Ngenang sentang asil ari operasyen ke udah dipejalaika nya, Ganda madah nadai orang udah kena tangkap, tang barang ke dijual sida bisi udah dirampas.
“Pengawa nangkap deka digaga nitihka Akta Copyright 1987(Acts 332)41(1)(d), lalu orang ke menggi kedai tauka kompeni ke besangkut paut deka dikanggau mantaika bukti produk ke udah dirampas nya dikena nentuka pengamat nya endang barang dipenggi sida.
“Nyema sida puntan mantaika pekara nya, raban KPDNKK, deka bejalaika atir lalu nangkap sida ke ditemu ngereja penyalah.
“Enti ditemu salah sida ulih ditinggang ukum RM2000 ngagai RM20,000(per copy) tauka jil lima taun, ba penyalah kedua kali sida deka diukum duit RM4000 ngagai RM40,000 (seiti chelak tiru) tauka jil enda ngelui 10 taun,” ku Ganda.
Ganda madah, tebal agi barang ke dirampas nya lagu Iban ari menua tu empu, VCD enggau DVD tu tajapan dipeda baka tulen tang nadai Libel Piring Segala.
“Berebak enggau nya, dikena mutarka penanggul tu, semua orang patut besaup munaska penanggul chelak tiru lalu anang semina ngarapka raban orang bekuasa aja.
“Bala kami ngarapka mensia mayuh ke bisi penerang sentang pengawa ke bisi besangkut paut enggai penyalah tu, sida ulih ngenataika diri meri penerang ngagai opis kami ke semak.
“Pekara tu beguna amat dikena ngemajuka industri muzik menua kitai, kelimpah nulung raban sida ke endang bempu produk awakka terus nyapai pemujur,”ku tandu Ganda.
Bela bisi datai rambau aum pengarang berita tu iya nya Pemesai Bekuasa KPDNKK Sarikei, Kennedy Karong.