KUCHING: Menteri Muda Pengerai Mensia Mayuh Datuk Dr Jerip Susil meransang genap Opis Kunsil Kandang Menua ransing agi ngiga sereta mantu raban orang ke seranta ti diau dalam kandang mengeri.
Ku iya, pengawa nya bebida enti dibandingka enggau pengawa ngiga orang ke tusah di menua pesisir ketegal ti mungkur kandang endur ke besai lalu pengeransing raban orang gawa ari ejensi nya ditagih.
“Program Munaska Penyeranta dalam kandang mengeri sebaka mega enggau pengeransing kitai ngemunas penyeranta di menua pesisir.
“Ketegal kandang endur ke dibungkur kelalu besai, opis kunsil kandang menua baka ke MPP, MBKS enggau DBKU dipinta ransing agi nyaup ngemujur program perintah tu.
“Opis Kunsil kandang menua patut ransing agi ngiga orang ke seranta ti begunaka tulung,”ku iya lebuh dikerandau pengudah nyuaka kunchi rumah ngagai seiku penerima program bantu rumah MPP, Bibi Dalir Kaur di Kota Sentosa kemari.
Seraya ti madah pengawa nya entara sebengkah pengawa ti nentuka ikas pemanah kereja (KPI) tiap ejensi, Jerip mega ngansak komuniti ke diau besemak nyaup perintah ngiga raban orang ke seranta ke diau dalam kandang mengeri.
Ku iya, komuniti bela megai tanggung pengawa nentuka rayat ke begunaka tulung nerima bantu nengah program ke bisi disedia perintah.
Bibi kemari nerima kunchi rumah nengah program ngemunas penyeranta MPP ke mega nyadi sebengkah ari tanggung pengawa rama (CSR) ejensi.
Rumah batu ke beungkus RM50,000 digaga ba tanah ke diempu Bibi ti udah ngerejister diri ba program E-kasih.
Kelimpah ari nya, program bantu rumah tu ulih dipinta orang ti nadai rumah tauka rumah udah kelalu jai sereta bisi ngembuan tanah ke diri empu tauka udah bulih pemendar ari kaban belayan bukai.