Anda di sini

Bantu pemakai RM600 deka disadung raban bansa Penan empu

Advertisement

KUCHING: Raban bansa Penan ke diau ba kandang menua sida iya empu deka dikearapka nyadi ejen nyadung pemakai ke beungkus RM600 sepintu, baka ti disemaya perintah ngagai komuniti Penan ke udah dipindahka ari genturung pendiau asal sida laban palan nya deka endur ngaga Tekad Ai Murum.

“Berengkah ari diatu, Opis Pelilih Menua deka beratika pengawa nyadung stuk pemakai nya ke beungkus urung RM600 sepintu. Raban bansa Penan ke diau ditu deka dikearapka nyadung pemakai ngagai komunti sida iya empu,”pia ku Kaban Kunsil Nengeri (ADUN) Belaga Liwan Lagang.

Penyampau raban bansa Penan ke diberi stuk pemakai nya ari tujuh buah genturung pendiau di Ulu Sungai Murum ti udah dipindahka ngagai Metalun enggau Tegulang laban genturung pendiau sida iya suba udah alai ngaga Tekad Ai Murum.

Kelimpah ari nya, Perintah Menua udah setuju meri elawin RM850 ninting bulan ngagai ninting pintu komuniti Penan ke kena bungkur pemansang  nya nyengkaum duit RM 1250 enggau laluh RM600 dalam perengkaguna bukai. SEB mega udah setuju enggau atur nya lalu deka nganjung barang nya.

Bedau lama ke udah, empat iku ketuai raban bansa Penan bisi ngaga ripot polis ngelaban Sarawak Energy Berhad (SEB) ti madahka kompeni nya enda nitihka semaya, ke alai penyampau duit ke diberi nya kurang lalu disilih enggau utai pakai.

Sida madah, enti dikira penyampau rega pemakai ke diberi nya enda datai RM600, nya alai sida minta elawin RM850 ninting bulan.

Menteri Muda Main Asal enggau Pesaka nya mega madah, penemu ke salah nya nyadi ketegal penyerekang penemu entara Penan enggau SEB ke sama bela udah setuju mantu Opis Pelilih Menua nganjung utai pakai nya ninting bulan ngagai Penan.

“Pekara nya berengkah nyadi ari bulan Februari lalu panjai nyentuk ke tiga bulan nangkanka nya. Dalam kandang tiga bulan nya, ungkup pemakai ke dianjung enda mayuh laban jalai ke ditengah sida nganjung pemakai nya rusak ketegal hari bangat endar ujan.

“Tambah mega, sekeda ejen ke dikearap bejalaika tanggungpengawa nya enda entu nemu nengah jalai balak nuju ngagai genturung pendiau Penan nya. Nya kebuah kami diatu ngaga atur baru enggau raban bansa Penan nya.

“Seiti agi penanggul ke ditapi ejen penyadung, iya nya mayar feri kena meraka Sg Melurangke alai sida dipinta mayar RM150 sekali bejalai,” ku Liwan.

Ku iya baru, SEB ke udah setuju deka mantu ngangkut barang pemakai enggau ati ke lurus.

“Nadai sekali ati ke enda manah deka beambi ulih ba bansa Penan. Pemakai nya enda datai ba komuniti Penan laban betapi enggau penusah pengangkut ngangkut pemakai nya.

Sebengkah ari pekara ti bisi dibantai Suhakam (Human Rights Commission), iya nya jalai ngagai genturung pendiau Penan balat jai, ke ngenusahka bala apai indai nembiak Penan nganjung anak sida ke sekula, taja pan ngena kerita 4WD, ku Liwan seraya madah ripot nya udah dianjung ngagai Opis Sekretari Besai Perintah Menua, Komiti Genturung Pendiau Baru Murum nyengkaum ngagai Opis Perambu Menua.

“Opis Pelajar mega udah ngemendarka bantu pemakai ngagai nembiak Penan. Penanggul diatu, iya nya nadai buding tauka rumah endur makai ba sekula nya. Kena ngemuntangka agi nembiak ke besekula, kami udah minta SEB mantu ngaga perengkaguna nya. Kelimpah ari nya mega, aku udah nulis surat ngagai Menteri Pelajar minta ngaga dua buah rumah tauka perengkaguna nya,” ku Liwan.

Diatu ba sekula di SK Metalun bisi urung 164 iku nembiak sekula lalu di SK Tegulang bisi 116 iku.

Advertisement