KOTA SAMARAHAN: Tiap bengkah polisi ti ditukuka perintah patut diperetika enggau dalam sereta diambi ari penerang ke amat lalu ukai ari penerang ke sengapa ditempa, Ku Menteri Dagang Temuai Datuk Amar Abang Johari Tun Abang Openg.
“Polisi ke dituku perintah tebal agi dikena nentuka servis enggau produk perintah disedia enggau engkeman lalu nyadi tanggungpengawa kitai ngerembai sereta ngemeran polisi nya.
“Peretika enggau dalam tiap bengkah polisi ke dituku ari penerang ke amat lalu ukai ari penerang ke sengapa ditempa.
“Pekara tu chukup berat ngambika kitai enda nyadi sebagi ari raban orang ke nadai mai penguntung ngagai ejensi, nengeri enggau menua,’ku iya.
Iya mansutka jaku tu ba pengerami ‘Majlis Anugerah Gemilang UNIMAS (MAGU) 2014 ke diatur di DeTAR PUTRA ditu, kemari.
Berindik enggau nya, Abang Johari ke mega Menteri Pengawa Berumah ngansak raban orang gawa UNIMAS majak nyikap diri enggau penau sereta pengelandik ke lebih agi ba atur dunya ke nadai besekat diatu.
Ku iya nambah, kitai semua patut nemu polisi perintah ke baru lalu majak nambah penau diri ke tau dikena maya kitai ngereja pengawa.
“Pekara tu berat ngambika kitai semua ulih majak mansang ke mua setipak enggau pinta servis perintah enggau pinta palan pelajar tinggi,’ku iya.
Dulu agi ari nya, Mandal Canselor Prof Dato Dr Mohamad Kadim Suaidi ba jaku pengelalu madah, MAGU 2014 meri basa ngagai 158 iku orang gawa universiti nya ke nerima Anugerah Perkhidmatan Cemerlang (APC).
Ku iya, gelar nya diberi ngagai orang gawa ti udah nyapai pemanah ikas gawa ngelui ari 85 peratus ungkup taun 2013 lalu nyaup nyapai tagit ti ditetapka.
Bela datai Sekretari Perintah Besai Datuk Md Yahaya Basimin, Sapit Mandal Canselor (Akedemik & Entarabansa) Prof Dr Fatimah Abang, Sapit Mandal Canselor (Pekara Pelajar & Alumni) Prof mohd Fadzil Abdul Rahman enggau orang bukai.